Голден Стэйт Уорриорс багийн нийт хөгжөөн дэмжигчдээс хэт мэдрэг фэнүүд уншихгүй байхыг зөвлөе !!!

Хойд Америкийн үндэсний сагсан бөмбөгийн холбооны шигшээ цуврал өнөөдөр дууслаа. Жил болгон л өдийд дуусдаг. Нэг нь ялж нөгөөх нь ялагддаг. Энэ жил ч гэсэн нэг нь л ялах байсан. Гэхдээ өнгөрсөн жилүүдээс нэг зүйлээрээ онцлог. Өмнө нь ширүүн өрсөлдөөн дунд хэн нь ялах нь тодорхойгүй үргэлжилдэг байсан цуврал энэ жил эхний тоглолтын дараагаас л ойлгомжтой болсон юм. Өнгөрсөн зуны хамгийн “балай”, хамгийн сенсаацитай шийдвэрийг гаргаж Оаклэндийн багт нэгдсэн Кэвин Дурант энэ жилийн шигшээ цувралыг дэндүү амархан болгочих шиг. Сүүлийн хэдэн жил 4:1 буюу жентелмен шүүрдэлтийг шигшээ цувралд харж байгаагүй болоод ч тэр үү, нэг л утгагүй. Ийм эрт үзэх зүйлгүй болж байгаад хөнгөн гуниг төрнө. Анхнаасаа ойлгомжтой болчихсон кино дундаасаа нойр хүргэдэг шиг. Гэхдээ спортод юу ч болдог учраас Кавалерсийн хөгжөөн дэмжигчид багаа цувралыг эргүүлнэ гэж найдаж байсан байх. Харамсалтай нь ялагч нь тодорхой кино зохиол зохиолынхоо дагуу өндөрлөв. Голдэн Стэйт Уорриорс аварга авлаа. Голдэн Стэйт 4:1 Кливлэнд.

Финалын “Хамгийн үнэ цэнэтэй тоглогч” нь Кэвин Дурант. Гэхдээ энэ цом нь түүний замналын хамгийн “үнэ цэнэгүй” шагнал байлаа. Яагаад? Яагаад гэвэл Голдэн Стэйт гэдэг баг энэ жилтэй нийлээд гурав дахь жилдээ финалдсан баг учраас. Тэд КД-г авсан аваагүй энэ жил ч гэсэн финалдах нь ойлгомжтой шахуу байсан учраас. Тэд өнгөрсөн жил 73-9 гэсэн амжилттайгаар улирлыг дуусгасан лигийн хамгийн шилдэг баг байсан учраас. Түрүү жил Оаклэнд хотод дараалсан аваргын цом авч ирэхэд ганцхан хожил л л хэрэгтэй байсан учраас. Тэд ганцхан хожлын төлөө 3 тоглолтод орж хангалттай туршлага хуримтлуулсан баг байсан учраас. Тэдэнд лигийг утгагүй болгох, лигийн хамгийн шилдэг оноо түүгч тийм ч шаардлагагүй байсан учраас. Кэвин Дурантад ч гэсэн энэ жил цуг аварга авсан багаа өнгөрсөн жил бүсийн шигшээд мултлахад мөн л ганцхан хожил хэрэгтэй байсан учраас. ОКС-ын лидер байсан тоглогч өөрт нь шаардлагагүй нүүдэл хийсэн учраас. Нэг өгүүлбэрээр хэлвэл аварга авах магадлалыг хэтэрхий тодорхой болгосон учраас. Энэ бол  сагсан бөмбөгийн спортын түүхэн дэх хамгийн үнэ цэнэгүй шагнал байлаа.

Түүний шийдвэр гаргадаг оройг би маш сайн санаж байна. Бостонгийн фэнүүд бүгд твиттэрийн жиргээг ширтэн сууж байлаа. Ирэх хамгийн өндөр магадлалтай багуудын нэг нь Бостон Сэлтикс байсан юм.  Бостонд ирсэндээ баяртай байна гэсэн утгатай жиргээ хаа сайгүй явж, цуурхал гарч эхэллээ. Бид унтлаа. Харин өглөө нь Кэвин Дурант Голдэн Стэйтэд ирчихсэн байсан юм.

Өөрөө ялж болох боломжтой цувралдаа хожигдсон. Эргээд тэр багтаа нэгдсэн. Тэр баг нь лигийн хамгийн шилдэг баг байсан гэдэгт л хамгийн гол учир оршиж байна. ЛэБроны Маиами Хиттэй нэгдсэн нэгдэлтэй их харьцуулдаг. Ерөнхий харагдах байдал төстэй. Гэхдээ нөхцөл байдал, цаг хугацааны хувьд тэс өөр зүйл. 

ЛэБрон нэгдэх үед Хит уналтад орчихсон баг байлаа. ЛэБрон өөрийг нь дарж байсан бүсийг тэргүүлэгч Бостон Сэлтикст нэгдээгүй. Харин КД өөрийнхөө ялж чадаагүй, магадгүй мөнх ялж чадахгүй байсан багтаа нэгдсэн. ЛэБрон Кливлэндэд эргэн ирэх үед энэ багт плэй оффын туршлагатай, тоглолтод нөлөө үзүүлэхүйц тоглогч Андэрсэн Варэжог эс тооцвол байгаагүй. Тэр нэг ёсондоо бусдыгаа чирж аваргын цувралд гардаг бол КД зүүгдэж гарахыг илүүд үзсэн гэдгээрээ хамгийн том ялгаа оршино. Одод нэгдэх талаасаа бол төстэй. Бусдаараа бол тэс өөр нүүдлүүд.

ЛэБрон ялж чадаагүй бүхнээ ялж аварга, финалын үнэ цэнэтэй тоглогч болж байсан бол КД хамгийн том өрсөлдөгчөө ялахгүйгээр “Үнэ цэнэтэй тоглогч”-ийн шагналыг авсан нь түүний шагналыг “үнэгүйдүүлж” байгаа юм.

Харин энэ бүхнээс Голдэн Стэйт багийн удирдлагууд их сайн ажиллалаа гэсэн дүгнэлт гарч байна. Тэднийг дахин аварга авахад саад болж чадах ганц хүн нь КД байсан. Түүнийг багтаа урвуулж шигшээ цувралд хүрэх замаа зассаны дээр зургаан од тоглогч бүхий баг бүрдүүлж аваргын замаа дардан болгосон юм.

Гэхдээ энэ зун тэд Стефэн Көрри, Андрэ Игудала, Шон Ливингстон, Заза Пачуля, Дэвид Вэст, Жавал Макгий,  Иэн Кларк, Мэтт Барнс гэх мэт тоглогчдоосоо нэлээн хэдийг нь алдах болно. Бүгдэнгийнх нь гэрээ энэ жил дуусч байгаа. Тэдэнтэйгээ үнэтэй гэрээ байгуулж үлдэж гэмээнэ дараа жил Клэй Томпсон, Дрэймонд Грийн, Кэвин Дурант гэх мэт тоглогчидтой гэрээ сунгахад хүндрэлтэй болно. Эдгээр гурван тоглогчийн гэрээ ирэх жилийн өдийд дуусна.

Иймээс ирээдүйд КД-г явуулж бусдыгаа хадгалж үлдэх үү? Бусдыгаа хадгалж үлдээд КД-г үлдээх үү гэдэг сонголтынхоо эхний алхмыг энэ зун хийх юм. Аль ч тохиолдолд КД яг одоогийнх шиг гараа сэлгээ тэнцүүхэн сүпер багт дахин тоглохгүй. Тэр үед аваргалж чадвал тэр шагналынхаа “үнэ цэнийг” нөхөн авах биз ээ. Эдгээр тоглогчдоос хэн хэнийг нь авч үлдэх, хэн хэнийг нь үлдээх бол?

Б. Энх-Амгалан