Унгарын алдарт Ференц Пушкашийн нэрэмжит “Пушкаш академи”-д жилийн хугацаатай суралцаад ирсэн дөрвөн хөлбөмбөгчин хүүг өнөөдөр Монголын Хөлбөмбөгийн холбооны Ерөнхийлөгч хүлээн авч уулзлаа.

Одоогоос есөн сарын өмнө МХБХ, “Пушкаш академи”-ийн хамтын гэрээний дагуу Б.Амгаланбат, О.Хантэнгэр, Г.Ганбаяр, Д.Тэмүүлэн гэсэн хөлбөмбөгчид жилийн хугацаатай Унгар улсад хөлбөмбөгийн мэргэжлийн академид суралцахаар эх орноосоо мордож байсан. Монголын хөлбөмбөгийн түүхэнд анх удаа хилийн чанадад урт хугацаагаар хөлбөмбөгийн академид суралцсан хөвгүүдийн суралцах хугацаа дууссан ч тэдэн дундаас Г.Ганбаяр академийнхаа багийн хамтаар “Сузуки цом” тэмцээнд оролцсон юм.

Европ төдийгүй дэлхийн хэмжээний клубүүд болох “Реал Мадрид”, “Байерн Мюнхэн”-ий 17 хүртэлх насны багууд оролцсон “Сузуки цом” тэмцээнд Г.Ганбаяр амжилттай оролцон хүрэл медаль хүртээд ирлээ. Хүрэл медаль хүртэхдээ хоёр тоглолтод сэлгээнээс оролцож, торгуулийн цохилтоор гоол оруулсан нь мөн л Монголын хөлбөмбөгийн түүхэнд тодоор тэмдэглэгдэх үйл явдал болсон. Уг баярт үйл явдлыг өнөөдөр МХБХ-ны Ерөнхийлөгч дөрвөн хүүгийн эцэг эхчүүд, гэр бүлийнхэнтэй хуваалцахын зэрэгцээ Европын тэмцээнд оролцон, медаль хүртсэн анхны Монгол хөлбөмбөгчин Г.Ганбаярт онцгойлон баяр хүргэлээ. Дашрамд дурдахад өнгөрсөн сарын 27-нд “Пушкаш академи”-ийн хоёр дахь жилийн сонгон шалгаруулалт явагдсан. Тиймээс Монгол хөлбөмбөгчид Европын тавцанд гарах, амжилт үзүүлэх эхлэлийг тавьсан анхдагч дөрөв маань булган сүүлтэй байхыг хүсэн ерөөе.

Б. Энх-Амгалан