Вашингтон Хаскийсийн од Маркэлл Фүлтзийг НБА драфтаар нэгдүгээр тойргийн тэргүүн сонголтоор сонгох хамгийн өндөр магадлалтай байгаа билээ. Тэгвэл залуу тоглогчийн хувьд өчигдрийг түүнийг авч болзошгүй байгаа Бостон Сэлтикс багтай бэлтгэл хийж, шаардлагатай сорилуудад оролцож өнгөрүүлсэн юм. Мөн багийн сагсан бөмбөгийн үйл аижллагаа хариуцсан ерөнхийлэгч, ерөнхий менежэр Дэнни Эйнжтэй цуг оройн зоог барьсан гэдгийг Дэнни Эйнж сэтгүүлчдэд өгсөн ярилцлагынхаа үеэр хэллээ.

Гэхдээ Сэлтикс түүнийг өөрийн багтаа нэгтгэх эсэх дээр нухацтай хандана гэдгээ мөн мэдэгдээд амжсан юм. Лонзо Болл, Дэ’Аарон Фокс, Жэйсон Татум, Жош Жэксон зэрэг тоглогчдыг Бостон хотын баг өөрсдийн овоо хараанд оруулаад байгаа гэнэ. Хэдий тийм боловч Лонзо Боллын хувьд Сэлтиксийн бэлтгэлд очихоос татгалзаад байгаа билээ. Мөн энэ жилийн драфтын ангийнхан Сэлтикс, Сакрэмэнто хоёроос бусад багт л орж байвал хамаагүй гэсэн цуу яриаг хүртэл дэгдээгээд амжсан. Учир нь энэ хоёр багт залуу тоглогчид багтаж шингэхгүй, багийн мэдүүлэгт байх тоглогчдын тоо хэтэрсэн  дүр зурагтай байгаа юм.

Б. Энх- Амгалан