НБА-ын шигшээ цуврал өнөөдөр эхэллээ.

Оракл Арина ордонд болж буй уг тоглолтод талбай эзэд буюу Голдэн Стэйт Уорриорс эхний хожлыг авснаар цувралыг 1:0 болгож байна. Хэн түрүүлж дөрөв хожсон нь аваргын цомыг өргөх ёстой уг тоглолтод энэ жилийн "шинэ цэрэг" Кэвин Дурант багаа тэргүүлсэн юм. Тэрбээр уг тоглолтод 26 довтолгооны оролдлогоос 14-ийг нь амжилттай болгож, нийт 38 оноо цуглуулахын хажуугаар 8 удаа самбараас бөмбөг авч, 8 довтолгооны дамжуулалтыг өгсөн байна. Түүний тоглолтод өнөөдөр өөлөх зүйл байсангүй. Бөмбөгөө нэг ч алдаагүйн дээр, хамгаалалтад онцгой байсныг дурьдах хэрэгтэй.

Голдэн Стэйт Уорриорст тоглож байгаа  “МВП” нь түүнд хамгийн сайн туслалцааг үзүүлсэн. Тодруулбал Стэфэн Көрри өнөөдөр 28 оноо авч, 10 ашигтай дамжуулалт өгсөн юм. Эсрэг багаас их гурвал өөрсдийн үүргийг сайн гүйцэтгэсэн ч багийн бусад нөхөд нь хангалттай сайн байсангүй. Цувралын хоёр дахь тоглолт манай цагаар даваа гарагийн өглөө 08:00 цагаас болох хуваарьтай. Тоглолт мөн л Оракл Аринад болох бөгөөд энэ тоглолтод Кливлэнд цувралыг тэнцүүлэх том даалгавартай талбайд гарна.

Б. Энх-Амгалан