Японы боксчин Ёшихиро Камэгайд Саул “Канэло” Алварезийг ялж аваргын бүс зүүхэд ганцхан даваа үлдлээ. Түүний замд саад болж байгаа эцсийн тулаанч нь хуучин аварга Мигуэл Котто. Тэгвэл Коттогийн эсрэг Камэгай гэсэн тулааныг наймдугаар сарын 2-нд Лос Анжелес хотноо зохиохоор товлосон тухай албаныхан мэдэгдлээ.

Мексикийн од Алварез нь энэ сарын эхээр Хулио Цезар Чавезийг ялсан юм.  Мөн есдүгээр сарын 16-нд жин өгсөж, Генади Головкинтой гурван бүсийг нь булааж авах том тулааныг товлочихоод байгаа. Казах од Головкин нь одоогоор ялагдаагүй байна.

Түүний өрсөлдөгч Камэгай нь өдгөө 34 настай. Харин Камэгайн эсрэг Алварез гэсэн тулаанд саад болж буй Котто нь 36 настай боксчин юм. Тэрбээр 2004 онд аваргын бүсийг зүүж байсныг уншигчид мэдэх биз ээ.

Тулааныхаа талаар “Дахин ийм өндөр зэрэглэлийн тулаанд хүч сорих гэж байгаадаа баяртай байна. Камэгай бол гайхалтай боксчин, хүндхэн өрсөлдөгч. Гэхдээ би түүнийг ялж, өөрөө аваргын бүсийн төлөө тулалдах болно. Хурдхан шиг бэлтгэлдээ орж, рингэн дээр гарах мөчөө тэсэн ядан хүлээж байна” гэж Котто сэтгүүлчдэд өгсөн ярилцлагатаа дурдсан байна. Нийт 45 тулаанд оролцож тавхан ялагдсан Котто 33 тулаанаа хугацаанаас нь өмнө хүнд цохилтоор дуусгаж байсан нэгэн юм. Мөн замналынхаа турш 5 жинд бүс эзэмшиж байжээ.

Харин түүний өрсөлдөгч Камэгай “Би рингэн дээр хэний эсрэг гарах гэж байгаагаа маш сайн мэдэж байна. Гэхдээ өөд өөдөөсөө харан зогсох тэр мөчөөс эхлээд түүний алдар нэр, цол гуншин надад огт хамаагүй болно. Би тулааныг үзэхээр ирсэн үзэгчдэд жинхэнэ тулаан гэж юу байдгийг харуулна. Яг л өмнө нь харуулдаг байсан шиг ээ. Эцэст нь шүүгч миний гарыг өргөнө” хэмээн мэдэгдсэн байна.

Тэрбээр 30  тулаанд оролцож 27-д нь ялалт байгуулсан юм. Үүнийхээ 24-т нь хүнд цохилтоор эсрэг тамирчнаа буулган авч байжээ. Харин сүүлийн зургаан тулаанд гурав хожиж хоёр хожигдсон бөгөөд нэг тулаанд нь тэнцсэн байна.  Өнгөрөгч есдүгээр сард Мексикийн Есүс Сото Карасстай хийсэн тулаан нь түүний хамгийн сүүлийн тулаан байсан юм.

Котто нь сүүлийн таван жилд гурав хожиж гурав хожигдсон гэсэн амжилттайгаас 2012 онд Флоёд Мэйвэйдэрийн эсрэг болсон тулаан нь хамгийн сонирхолтой тулаануудынх нь нэг юм. Мөн Алварезийн эсрэг 2015 онд тулалдсаныг онцолж болох биз ээ.

Б. Энх- Амгалан