ОХУ-ын чөлөөт бөхийн насанд хүрэгчдийн аварга шалгаруулах тэмцээн тус улсын Назрань хотноо зургаадугаар сарын 12-15-нд болохоор товлогдоод байгаа.

Тэгвэл уг тэмцээнд бэлтгэх үүднээс Якутын чөлөөт бөхийн холбоо манай эрэгтэй бөхчүүдтэй хамтарсан бэлтгэл хийх хүсэлт тавьжээ. Монгол Улсын гавьяат тамирчин Г.Мандахнаран, ОУХМ Э.Ням-Очир, З.Занабазар, Т.Тулга, СМ Н.Амарсайхан нар гавьяат дасгалжуулагч А.Цэдэнсодномын хамт Якутад 14 хоногийн хамтарсан бэлтгэл хийхээр тус улсад очоод байна.

Якут болон манай бөхчүүдээс гадна Казахстаны эрэгтэйчүүдийн шигшээ багийн зарим тамирчид хамтарсан бэлтгэл хийхээр Саха хотод цуглаад байгаа юм. Манай бөхчүүдийн хувьд зургаадугаар сарын 10-11-нд болох сонгон шалгаруулах тэмцээний өмнөх томоохон бэлтгэл нь болж байна.

Б. Энх-Амгалан