“Vision-2014” хөтөлбөрийн хүрээнд Солонгосын Инчеон хотын дарга Юү Жонь Буг манай улсад хүрэлцэн ирж, өчигдөр МҮОХ-ны байранд зочлов.

Инчеон хотоос зохион байгуулдаг “Vision-2014” хэмээх хөтөлбөр нь Азийн орнуудын спортыг ижил түвшинд хөгжүүлэх зорилготой юм. Тус хотоос хамтарсан бэлтгэл хийх, тэмцээн уралдаанд оролцох, тоног төхөөрөмжийн бүх зардлыг гаргадаг. Өмнөх жилүүдэд манай улсын байт харваа, хүндийн өргөлт, дугуйн спортын тамирчид энэ хөтөлбөрт хамрагдаж амжилт, ур чадвараа ахиулж байсан.

Харин энэ жил чөлөөт бөхийн зургаан тамирчин, дасгалжуулагчдын хамт уг хөтөлбөрт хамрагдахаар болж ирэх намар Инчеон хотыг зорих болжээ.

Инчеон хотын дарга Юү Жонь Буг “Энэ удаагийн миний айлчлал маш олон зорилготой. “Мөрөөдлийн төгөл” мод тарих арга хэмжээг зохион байгуулж, байгаль орчны салбар дахь хоёр улсын хамтын ажиллагааг өргөжүүлнэ. Мөн “Vision-2014” хөтөлбөрийн хүрээнд спортын үйл ажиллагааг улам бүр шат ахиулах зорилготой” хэмээн онцоллоо.

Эх сурвалж: Улаанбаатар /МОНЦАМЭ/.

Б.Энх-Амгалан