Азийн АШТ-д анх удаа оролцож, хэсгийн шатнаас шалгарсан Монголын залуучуудын футзалын шигшээ баг өнөөдөр шөвгийн наймын тоглолтоо Узбекистан улсын багтай хийлээ.

Футзалын чансаагаараа дэлхийн 27, Азийн дөрөвдүгээр байрт бичигддэг Узбекистан улсын хаалганд А.Тэмүүжин, Б.Баттулга нар нэгдүгээр үеийн эхэнд гоол оруулж манай баг 2:0-ээр тэргүүлээд байлаа. Гэвч футзалын арвин их туршлагатай улсын залуус богино хугацаанд гурван гоол оруулснаар тоог 3:2 болгон давамгайллыг гартаа авав. Нэгдүгээр үед орох гоолын тоо үүгээр гүйцсэнгүй Э.Бат-Оргил, Б.Баттулга нар гоол оруулсан ч 5:4-өөр эхний үе өндөрлөлөө.

Хоёрдугаар үе эхлээд удаагүй байхад Ж.Цогтбаатарын гүйцэтгэсэн булангийн цохилт замдаа "хачир" авч эсрэг багийн тоглогч өөрийн хаалганд гоол оруулж, тооны харьцаа 5:5 болон тэнцсэн. Түүний дараа Узбекстаныхан тоог 6:5 болгосон бол манай багаас Г.Цолмонбаатар тоог тэнцүүлснээр үндсэн цаг дуусч, нэмэлт цаг гарсан. Нэмэлт цагт манай багаас О.Есүхэй Б.Баттулгын дамжуулалтаар маш чухал гоолыг оруулан тоог 6:7 болгосон ч эсрэг баг нөгөө л хаалгач нь хүртэл довтолгоонд ордог, таван тоглогчтой хувилбараа ашиглан тоог тэнцүүлэв. Тэрхүү гоол ороод удаагүй байхад Узбекситанчууд өмнөх гоолтой адилхан хувилбар ашиглан тэргүүллийг авч, нэмэлт цаг дуусахаас өмнө нэмж хоёр гоол оруулснаар 10:7-оор хожлоо. Тоглолтын төгсгөлд орсон гоолууд нь манайхан дутуугаа нөхөх гэж хаалгаа орхин бүгд довтолгоонд орсноос болсон юм.

Ийнхүү манай залуучуудын футзалын шигшээ баг тэмцээнээ өндөрлүүлсэн ч Ази тивд нэгээхэн “дуулиан”-ыг тариад авлаа. Одоогоор футзалаар тив дэлхийн чансаанд багтаж амжаагүй яваа манай шигшээ баг олон жил тогтмол амжилттай тоглож буй Иран, Киргиз, Хятад, Арабын Нэгдсэн Эмират, Узбекистан улсын эсрэг гайхалтай тоглолтыг үзүүлсэн юм. Эцэст нь Азийн АШТ-нд амжилттай оролцсон шигшээ багийн бүх гишүүд болон тэдгээрийн ард байж, тусалж дэмжсэн багш дасгалжуулагч, клуб, ивээн тэтгэгч нарт болон одоогоос арав гаран жилийн өмнө “Дуулиан 2020” төслийг санаачилж байсан төслийн багийнханд халуун баяр хүргэе. 2020 он хүртэл ахиад гурван жил дутуу байна.

Б.Энх-Амгалан