Сангийн сайд Б.Чойжилсүрэн өчигдөр /2017.05.16/ цаг үеийн асуудлаар мэдээлэл хийсэн. Энэ үеэр автомашины онцгой албан татварыг нэмэх хугацааг хойшлуулах боломжтой эсэхийг тодрууллаа.

Тэрбээр “ОУВС-тай 2016 оны наймдугаар сараас 2017 оны хоёрдугаар сар хүртэл  нийтдээ 7 сарын хугацаанд хэлэлцээр явуулсан. Хэлэлцээр хийх үед ОУВС-аас манай улсад автомашины  онцгой албан татвар олон улсын жишигтэй харьцуулахад хэт доогуур байна гэсэн. Дэлхийн улс орнуудад онцгой албан татвараар ДНБ-ээ найман хувьтай тэнцэх хэмжээний орлого цуглуулдаг бол манай улсад 560 орчим тэрбум төгрөгийн орлого цуглуулдаг. Энэ нь ДНБ-ий 2.1 хувь. Тэгэхээр ойролцоогоор онцгой татварын хэмжээ дэлхийн улс орнуудтай харьцуулахад 4 дахин бага байгаа юм. ОУВС-аас ийм зөвлөмжийг өгсөн учраас тодорхой хэмжээний татваруудыг үе шаттайгаар нэмэгдүүлэхээр  ОУВС-тай харилцан тохиролцож, УИХ, төсвийн тодотголд суулгаж батлуулсан. Үүнд автомашины татварыг 100 хувь хөнгөлдөг байсныг 50 хувь хөнгөлөх шийдвэрийг УИХ-аас гаргасан. Гэвч хүндрэл үүссэн талаар ОУВС-д хүсэлт илэрхийлсэн. Хариу ирээгүй байна.

Тавдугаар сарын 24-ний өдөр ОУВС-ийн захирлуудын зөвлөл хуралдахаа мэдэгдсэн. Энэ хурлаар манай асуудал хэлэлцэгдэнэ.  Олон нийтийн дунд эдийн засгийн эрх мэдлээ гадаадад шилжүүллээ гэсэн асуудал явж байгаа. ОУВС-аас тусламж хүсэхэд, төсвийн алдагдлаа бууруулах, өрийн тогтвортой байдлыг үүсгэх гэсэн шаардлагуудыг тавьсан. ОУВС-д ороогүй тохиолдолд улс орны эдийн засаг дампуурах учраас өөр ямар ч сонголт байгаагүй. Энэ хөтөлбөрт хамрагдсанаар эдийн засгийн ямар нэг эерэг нөлөө үзүүлнэ" хэмээв.

 Г.Тэгшсүрэн