Италийн Сери А лигийн Пескара багийн хагас хамгаалагч Саллей Мунтаригийн арьс өнгөний үзлээс үүдсэн асуудал спортын ертөнцийн гол шуугиануудын нэг болоод байна. Үйл явдлын хувьд Сери А лигийн тоглолтын үеэр өрсөлдөгч багийн хэсэг дэмжигчид Мунтариг арьс өнгөөр доромжилж, тэсгэл алдсан Мунтари шүүгчээс 2 дахь шар хуудсаа авснаар талбайгаас хөөгдсөн юм. Үр дүнд нь Мунтари Италийн хөлбөмбөгийн холбооноос нэг тоглолт өнжих шийтгэл хүлээсэн юм. Тэрбээр шийтгэлээ буцаахыг хүссэн ч холбоо ямар нэг хариу өгөөгүй юм. Үүнд ундууцсан Гана эр Италийн хөлбөмбөгийн холбоо арьс өнгөний үзлийг дэвэргэж байна гэж шүүмжилсэн. Тэрбээр мөн “Европын хөлбөмбөгийн холбоо болон ОУ-ын хөлбөмбөгийн холбоог шүүмжилж, арьс өнгөний үзлийн эсрэг ямар нь арга хэмжээ авахгүй байна” гэж буруутгасан юм. Хэрвээ ОУХБХ-ноос энэ хэрэгт оролцож эхэлбэл хамгийн түрүүнд Италийн хөлбөмбөгийн холбоонд хариуцлага тооцох магадлалтай.

С.Мунтари Италийн лигт тоглож байгаа бүх өнгөт арьст тоглогчдыг тэмцэлд дуудаж, Италийн хөлбөмбөгийн холбоог эсэргүүцэхийг уриалаад байна.

Г.Баяраа