Төрийн өмчийн болон төрийн өмчийн оролцоотой 90 гаруй компани  аж ахуй нэгжүүд нэгдсэн  “Төрийн өмчийн менежмент ба Нийгмийн хариуцлага-2017”  үзэсгэлэн болсон.  Төрийн өмчийн оролцоотой компаниудын үйлчилгээг нэг цэгээс иргэдэд хүргэж, төр-хувийн хэвшлийн түншлэлийг идэвхжүүлсэн ажил хэрэгч хамтын ажиллагаа энд өрнөсөн гэж хэлж  болно.  Өдөрлөгийн үеэр “Эрдэнэс Монгол” ХХК-ийн Гүйцэтгэх захирал Ц.Түмэнцогттой зарим зүйлийг тодрууллаа.

-Өнөөдрийн арга хэмжээний ач холбогдлыг та яаж дүгнэж байна вэ?

-Төрийн өмчийн бодлого зохицуулалтын газраас Төрийн өмчийн оролцоотой компаниудын үйлчилгээг нэг цэгээс иргэдэд хүргэх, үйл ажиллагааг нь олон нийтэд сурталчлах, хамтарч ажиллах нөхцлийг бүрдүүлэх, төр-хувийн хэвшлийн түншлэлийг идэвхжүүлэх замаар эдийн засгийн хүндрэл бэрхшээлийг даван туулах ажил хэрэгч хамтын ажиллагааг өрнүүлж байгаад талархаж байна. Өнөөдрийн арга хэмжээ Төрийн өмчит компаниудын Засаглалын түвшинг цаашид хэрхэн сайжруулах, төрийн менежментийг оновчтой, ил тод нээлттэй болгох гол өгөөжийг агуулж байгаа гэж ойлгож байна.

-"Эрдэнэс Монгол" компани бол эдийн засгийн суурь болсон уул уурхайн салбарын томоохон компаниудын нэгдэл гэж ойлгож болно. Танай компанийн зүгээс охин компаниудынхаа хэмжээнд нэгдсэн менежментээр ажиллаж чадаж байна уу?

-Тиймээ, тус тусдаа зорилго тавиад ажиллах биш нийгэм, эдийн засгийн хөгжилд бодитой хувь нэмэр оруулах, компанийн хувьцаа эзэмшигчийн хүртэх өгөөжийг боломжит дээд түвшинд хүргэх, иргэдийн эзэмшдэг хувьцаанд ногдол ашиг тараах боломжийг нэмэгдүүлэх зэрэг үүднээс бүх охин болон хараат компаниудын үйл ажиллагааны зардлыг бууруулж, үйл ажиллагааны нэгдсэн стратеги бодлогыг хэрэгжүүлэх бодлогыг баримталж ажиллаж байна. Ингэснээр нэгдсэн нэг зорилгын төлөө ажиллах компанийн нэгдлийг бий болгохоос гадна олон улсын жишигт нийцсэн компанийн сайн засаглалын туршлагыг нэвтрүүлж, бүх компаниуд хувьцаа эзэмшигчийнхээ хүртэх өгөөжийг нэмэгдүүлэх үүднээс цэвэр ашгийн төлөө, бизнесийн зарчмаар ажиллах боломж  бололцоог бүрдүүлэх юм.

Манай компани өнгөрсөн 10 жилийн хугацаанд өөрийн болон охин компаниудын хэмжээнд сайн засаглалыг хөгжүүлэх, бие даасан үйл ажиллагааны тогтолцоог хэвшүүлэх зарчмаар ажиллаж ирсэн. Өнгөрсөн онд бид  Олон улсын санхүүгийн корпорациар засаглалын үнэлгээг хийлгэж , санхүүгийн болон үйл ажиллагааны менежментийг чадавхжуулах зорилгоор Азийн хөгжлийн банкнаас техникийн туслалцааны төслийг авч хэрэгжүүлж байгаа. Мөн дэлхийн 4 том аудитын компанийн нэгд тооцогддог “Эрнст энд Янг” компаниар аудит хийлгэж, "Эрдэнэс Монгол" болон охин компаниудын хэмжээнд “олон улсын санхүүгийн тайлагналын стандарт”-ыг нэвтрүүлсэн. Энэ нь олон улсын зах зээлээс хөрөнгө оруулалт татах боломжийг бүрдүүлэх чухал ач холбогдолтой. 

-Танай компанийг Сингапурын загварыг нэвтрүүлнэ гэж байсан.  Тэр загвар нь ямар онцлогтой бол?

-“Эрдэнэс Монгол” ХХК  Сингапурын Темасек компанийн загвараар үйл ажиллагаагаа явуулах зорилт тавин ажиллаж байна. Темасек компанийн хууль ёсны эрх ашгийг Сингапур улс Үндсэн хуулиараа хамгаалсан байдаг бөгөөд ийм хууль эрх зүйн дархлааг  “Эрдэнэс Монгол” ХХК болон түүний бүрэлдэхүүнд багтаж буй компаниудад хэрэгжүүлэх ёстой гэж үзэж байгаа юм. Өөрөөр хэлбэл, олон улсын жишигт нийцсэн бие даасан арилжааны горимоор цэвэр бизнесийн зарчмаар үйл ажиллагаагаа тогтвортой явуулах статустай болох шаардлагатай. 

Н.Энх