“Дарханы төмөрлөгийн үйлдвэр” ТӨХК-ийг 2014 онд Концессын гэрээгээр хувьчилсан. Үүнээс хойш тус  үйлдвэрийн ажилчид хохирч байгаа талаар Эрчим хүч, геологи, уул уурхайн үйлдвэрчний эвлэлийн холбооны дарга Х.Буянжаргал  мэдээллээ.

Хөдөлмөрийн тухай хуулинд ажилтны буруугаас шалтгаалаагүй сул зогсолтын хугацаанд ажилтныг өөр ажилд шилжүүлэх, боломжгүй бол хамтын гэрээнд заасны дагуу нөхөн олговор олгоно. Хамтын гэрээгээр тодорхойлсон сул зогсолтын олговрын хэмжээ нь уг ажилтны үндсэн цалингийн 60 хувь буюу түүнээс дээш байх ба цалин хөлсний доод хэмжээнээс доогуур байж болохгүй гэсэн заалт бий.

“Дарханы төмөрлөгийн үйлдвэр” ХК-ийн 300 гаруй ажилчин 2015 оны эхнээс сул зогсолтын олговороо аваагүй байгаа аж. Ажилчид нийт 600 сая төгрөгийн авлагатай юм байна. Мөн хувьчлал хийгдсэнээс хойш тус үйлдвэр ашиггүй ажиллах болсныг Эрчим хүч, геологи, уул уурхайн үйлдвэрчний эвлэлийн холбооны дарга Х.Буянжаргал  хэлж байна.

 Тэрбээр “Хувьчлал хийгдсэнээс хойш төмөрлөгийн үйлдвэр биш төмөр ачдаг уурхайн хэмжээнд хүрээд байна. Ажиллагсдын амьдралын баталга алдагдсан, тогтвортой ажлын байргүй болсон. Тийм учраас энэ хувьчлалын асуудлыг эргэж хараач гэдэг асуудлыг Ерөнхий сайдад тавьсан” хэмээв.

Ерөнхий сайд ажлын хэсэг байгуулж шалгая гэдэг хариултыг өгсөн байна.

Г.Тэгшсүрэн