Монголын үнэт цаасны арилжаа эрхлэгчдийн холбооноос арилжааны банкууд 1072 ширхэг хувьцаагаа арилжаалах тухай иргэдийн хүсэлтийг авахдаа болон олгохдоо хууль зөрчиж буй талаар мэдээлэл хийлээ. Тус хэвлэлийн хуралд МҮЦАЭХ-ны удирдах зөвлөлийн дарга Б.Өлзийбаяр, тус холбооны ерөнхий нарийн бичгийн дарга Ц.Хуяг нарын хүмүүс оролцов.

Засгийн газраас иргэн бүрт эзэмшүүлсэн байгаа 1072 ширхэг хувьцааны 322 хувьцааг багцаар нь 300 мянган төгрөгөөр худалдаж авах тогтоол гаргаад байна. Энэ үйл ажиллагааг арилжааны банкуудаар дамжуулан хийж байгаа. Энэ нь үнэт цаасны зах зээлийн хууль болоод, компанийн тухай хуулийн хэд хэдэн заалтыг ноцтой зөрчиж байгаа гэж үзэж буйгаа МҮЦАЭХ-ын удирдах зөвлөлийн дарга Б.Өлзийбаяр хэлэв.

Тэрбээр “Үнэт цаасны зах зээлийн тухай хуулийн зохицуулалтад хамрагдах үнэт цаасанд дараах санхүүгийн хэрэгслүүд орно. Үүнд компанийн хувьцаа гэж зааж өгсөн байгаа. Тэгэхээр хувьцааны худалдах үйл ажиллагааны журмыг санхүүгийн зохицуулах хорооноос тогтоосон байгаа. Компанийн хувьцааг борлуулах, арилжаалах аливаа үйл ажиллагааг санхүүгийн зохицуулах хорооноос тогтоосон журмын дагуу явуулах бөгөөд энэ үйл ажиллагааг зохицуулах ёстой эдгээдүүд хийдэг юм. Тодруулбал үнэт цаасыг борлуулах тусгай зөвшөөөрөлтэй үнэт цаасны компаниуд хийдэг үйл ажиллагаа юм. Тэгэхээр хувьцааг арилжаалах үйл ажиллагааг банкуудаар зуучлуулж хийж байгаа нь энэ хуулийг зөрчсөн үйлдэл болж байна гэж үзэж байна. Банкуудын тухай хуулинд ч ашиг олох зорилгоор энэ төрлийн үйл ажиллагааг хориглосон байдаг. Нөгөөтэйгүүр Загсийн газар хувьцааг худалдаж авах тогтоолдоо банкуудад 3 хувийн шимтгэл өгнө гэж заасан байна. Харин брокор диллерийн компаниуд арилжааны шимтгэлийг дунджаар 2 хувь авдаг. Энэ хувиасаа бид 25 жилийн турш Үнэт цаасны төлбөр тооцооны төвлөрсөн хадгаламжийн төв, Хөрөнгийн бирж, Санхүүгийн зохицуулах хороо зэрэг 100 хувь төрийн өмчит компанийг тэтгэсээр ирлээ. Тэгэхэд өнөөдөр иргэдээс хүсэлтийг нь аваад дансанд нь мөнгө байршуулсныхаа төлөө 3 хувийг банкуудад төлөх юм байна. Энэ нь мөнгөн дүнгээрээ 1 хүний 9 мянган төгрөг гэсэн үг. Энэ мөнгө татвар төлөгчдийн мөнгөнөөс л гарна. Мөнгө тарааж болно. Гэхдээ энэ чинь хувьцаа юм бол хувьцаа арилждаг үнэт цаасны зах зээл, Хөрөнгийн бирж, брокор диллерийн компаниудаар нь хийлгээч. Бид 5 жил данс нээх үйл ажиллагааг хийсэн. Одоо тэгсэн иргэд төөрөгдөлд ороод 5 мянган төгрөгөөр танайд нээлгэсэн данс яах болж байна гээд манайд хандан бухимдаж байна. 2011 оноос хойш 700 мянган хүн брокор диллерийн компанид данс нээлгэсэн байгаа” хэмээв.

Г.Тэгшсүрэн