“Монголдоо сайхан амьдармаар байна” уриан дор иргэний нийгмийн 109 байгууллага саяхан чуулсан билээ. Уг чуулганыг зохион байгуулагчдаас  энэ сарын 7-ны өдрийг “Бүх нийтийн үндэсний эсэргүүцлийн өдөр” болгон зарлаж Чингисийн талбайд эсэргүүцлийн жагсаал хийхээ мэдэгдэв. Эсэргүүцлийн жагсаал болох гэж байгаатай холбогдуулан өнөөдөр “Гамшгийн эсрэг үндэсний төв”-ийн зохицуулагч  Ж.Ганбаатар, “Гал үндэстэн” холбооны гүйцэтгэх захирал Я.Хундаганай, “Урангүй Монгол” хөдөлгөөний идэвхтэн Ч.Мөнхбаяр зэрэг төлөөлөл хэвлэлийн хурал хийлээ.

Эсэргүүцлийн жагсаалаар ураны хор хохирлын талаар иргэдэд мэдээлэл өгч, “Урт нэртэй хуулийг дагаж мөрдөх тухай” хуулийн заалтад өөрчлөлт оруулах гэж байгаа асуудлын тухай байр сууриа илэрхийлэх аж. Мөн хэлмэгдсэн гэгдэж байгаа Гал үндэстэн холбооны Ц.Мөнхбаяр тэргүүтэй нөхдийн давж заалдах шатны шүүх хурал болох гэж байгаатай холбогдуулан тэдгээр залуусын төлөө дуу хоолойгоо нэгтгэнэ хэмээн хуралдаанд оролцогчдийн зүгээс мэдэгдсэн юм.

“Ц.Мөнхбаяр тэргүүтэй хүмүүст бүгдэд нь ялгаагүй 21 жилийн ял оноосон нь хууль бус үйлдэл гэж үзэж байна. Хэлмэгдэж хоригдсон хүмүүсийг суллах нь зүйтэй” хэмээн “Урангүй Монгол” хөдөлгөөний идэвхтэн Ч.Мөнхбаяр дурьдлаа. Мөн Засгийн газарт хүргүүлсэн 10 зүйл бүхий шаардлагынхаа хариуг энэ өдөр нэхнэ гэж мэдэгдлээ. Эсэргүүцлийн жагсаалыг тайван замаар явуулахаа хуралдаанд оролцогсод онцолсон юм.

Ж.Мөнхзул