“Иргэдийн шударга шүүх”, “Хохирогчдын холбоо” ТББ-ын төлөөлөл өнөөдөр сэтгүүлчдэд хандан мэдээлэл хийлээ.

Тэдний хөндсөн нэг асуудал нь төрийн албан хаагчдын буруутай үйл ажиллагааны улмаас улсад учирсан хохирлын тухай байлаа. Тодруулбал, Төрийн албан хаагчдын буруу шийдвэрийн улмаас иргэд аж ахуй нэгжид учирсан 23 тэрбум төгрөгийн хохирлыг өнгөрсөн 2011, 2012 онуудад улсын төсвөөс төлж барагдуулсан тухай баримт буй аж.

Уг мэдээллийн дагуу төсөвт хохирол учруулсан хууль бус шийдвэр гаргасан төрийн албан хаагчдын мэдээллийг олон нийтэд ил тод мэдээлж, тэднээс 23 тэрбум төгрөгийг гаргуулан улсын төсөвт учирсан хохирлыг барагдуулахыг шаардлаа.

Тэд ийм байдлаар алдаатай шийдвэр гаргаж, төсөвт хохирол учруулсан этгээдүүдэд эд хөрнөгийн болон эрх зүйн хариуцлага хүлээлгэхгүй байгаа нь Төрийн албаны хууль зөрчсөн ажиллагааг дэмжин өөгшүүлсэн зохисгүй үйлдэл гэж буруутгаж буйгаа илэрхийлсэн.

Мөн энэ үеэр “Иргэдийн шударга шүүх” ТББ-ын тэргүүн Х.Бат-Ялалт Хууль зүйн сайд Х.Тэмүүжинг тав дахь удаагаа халз мэтгэлцээнд урьсан.

Б.Буд