МАН-ын шинэ удирдлага тамгаа гардан аваад удаагүй байна. Тус намын удирдах шинэ бүрэлдэхүүн дотоод зохион байгуулалтаа шинэчлэн, өөрчлөхөөс ажлаа эхлэхээр төлөвлөсөн бололтой. Өнгөрсөн баасан гаригт МАН-ын Удирдах зөвлөл хуралдаж,  газрын дарга нарыг томилжээ.

1

Их хурлаараа тус нам дүрэмдээ өөрчлөлт оруулсан. Уг дүрмийн дагуу нам дэргэдээ зургаан газартай байхаар болсон байна. Өмнөх дүрмээрээ Намын байгууллагын, Хэвлэл мэдээлэл, олон нийттэй харилцах, Хүний нөөц, Гадаад харилцаа, хамтын ажиллагааны, Сан хөрөнгийн, Сургалт судалгааны гэсэн зургаан хэлтэстэй байсан. Дүрэмд өөрчлөлт орсноор хэлтсээ газар болгон өргөтгөжээ. Ямартай ч тус намын Хэвлэл мэдээлэл, технологийн газрын даргаар Н.Дэмбэрэл томилогдсон байна. Тэрбээр  өмнө нь МАН-ын дарга М.Энхболдыг Ерөнхий сайд байх үед ЗГХЭГ-ын Хэвлэл мэдээллийн албаны даргаар ажиллаж байсан юм. Бусад газрын даргаар хуучин Тамгын газрын дарга байсан Ш.Раднаасэд болон Ж.Тамираас бусад нь буюу Ж.Ариунзаяа, н.Даваасүрэн, С.Чинзориг нарын шинэ хүмүүс томилогдсон байна.

1

Тус намын бага хурлаас намын төв хэвлэл “Монголын үнэн” сонины Ерөнхий эрхлэгчийг томилдог байсан. Гэвч шинэ дүрмээрээ намын дарга нь санал болгон, Удирдах зөвлөлөөс томилж байхаар шинэчлэгдсэн аж. МАН-ын дарга М.Энхболд “Үндэсний шуудан” сонины орлогч эрхлэгч Г.Отгонбаярыг “Монголын үнэн” сонины Ерөнхий эрхлэгчээр томилуулахаар УЗ-дөө санал оруулсан сураг дуулдана.

1

Н.Нягт