Увс аймаг дахь УИХ-ын сонгуулийн маргааны хэрэг шүүхээр эцэслэгдсэн Сонгуулийн ерөнхий хороо /СЕХ/ эцэслэн шийдэх ёстой гэсэн шийдвэрийг шүүх гаргасан талаар АН-аас мэдэгдэж байсан. Улмаар АН-аас нэр дэвшигчид СЕХ-нд өнгөрсөн есдүгээр сарын 13-нд гомдол гаргасан ч СЕХ-оос одоогоор ямар нэгэн хариу өгөөгүй байгаа юм.  Энэ талаар АН-ын Ерөнхий нарийн бичгийн дарга Ц.Оюундариас тодрууллаа.

6

-Увсын сонгуулийн маргааныг Сонгуулийн Ерөнхий хороо эцэслэн шийдвэрлэнэ гэсэн дүгнэлт гарсан. Энэ асуудал юу болж байна?

-АН-аас өнөө маргаашгүй СЕХ-нд хандаж дахин өргөдөл өгөх гэж байгаа. Өргөдөл өгөөгүй тохиолдолд СЕХ асуудлыг авч хэлэлцэх боломжгүй юм байна. Бид өмнө нь дөрөвдүгээр сард СЕХ-нд өргөдөл өгч байсан. Яг тухайн үед шүүхийн шийдвэр эцэслэн гараагүй байсан учир тэр өргөдөлд хариу өгөх боломжгүй байсан. Одоо бол шүүхийн шийдвэр эцэслэн гарсан учир АН-ын зүгээс Увсаас нэр дэвшсэн хоёр гишүүний мандатыг хүчингүй болгохыг хүссэн өргөдөл өгнө. Өргөдөл өгснөөс хойш 30 хоногийн дотор шийдвэрлэх ёстой. Дахин шалгах шаардлагатай бол хоёр сарын хугацаанд асуудлыг шийддэг.

6 -АН эрх баригчийн байр сууринаас СЕХ-г дарамталж байна гэж үзэх байна. Үүнд та ямар тайлбар хийх вэ?

-СЕХ бол шүүх байгууллагтай ижил. Энэ бол улс төрөөс хараат бус байх ёстой. Эрх барьж байгаа нам СЕХ-г нөлөөндөө байлгадаг тогтолцоо өмнө нь байсан. н.Баттулга даргыг та бүхэн мэдэж байгаа байх. Тэр хүн их нөлөөнд орж, ямар их хууль бус шийдвэрүүдийг гаргадаг байсан билээ. АН бол үүнийг хамгийн их шүүмжилдэг. Тиймээс бид шүүмжилдэг байсан зүйлийнхээ эсрэг үйл ажиллагаа явуулахгүй гэдэг үүднээс бид ил тод, хэвлэл мэдээллийнхэнтэй хамт шаардлагуудаа тавьж байгаа. Түүнээс биш бид хөшигний цаана уулзаж, үүрэг даалгавар өгөөгүй. Бид ийм зарчмыг цаашдаа хэрэгжүүлж ажиллах учраас бүх зүйлийг хуулийн дагуу ил тод хийх болно.

6

П.Наран