МАН -ын XXVII их хурал ямар ч гэсэн үүргээ гүйцэтгэж намын дарга, Ерөнхий нарийн бичгийн дарга, Удирдах зөвлөл, Бага хурлынхаа гишүүдийг шинэчлэн сонгож, баталгаажуулснаар өндөрлөсөн билээ. Өөрөөр хэлбэл, МАН нарын бичгийн дарга нарынхаа тоог цөөлж хоёр болгосон юм.

Тэгвэл өнөөдөр МАН-ын орон нутаг, намын байгуулалт хариуцсан нарийн бичгийн дарга асан Ж.Сүхбаатар ажлаа хүлээлгэн өглөө. Түүний ажлыг Х.Булгантуяа гэх бүсгүй хүлээн авлаа.

Х.Булгантуяагийн хувьд улс төрд ороод удаагүй байгаа бөгөөд улстөрчийн хувьд хараахан олонд танигдаж амжаагүй нэгэн юм. Тэрбээр өнгөрсөн  орон нутгийн сонгуульд Хан-Уул дүүрэгт өрсөлдөн “өвдөг шороодож” байсан ч мэдлэг, хичээл зүтгэлийнхээ үрээр НАМЗХ-ны жендер хариуцсан дэд ерөнхийлөгчөөр ажиллаж байгаа юм. Тухайлбал Х.Булгантуяа МАН-ын нарийн бичгийн даргаар сонгогдсоныхоо дараа индэр дээрээс “Н.Энхбаяр” даргадаа  баярлалаа хэмээсэнд “намынхаа даргын нэрийг ч мэдэхгүй хүн нарийн бичгийн даргаар сонгогдлоо” хэмээн шүүмжлэх хүмүүс ч олон байсан.

Тэгвэл өнөөдөр ажлаа хүлээлгэн өгч байгаа Ж.Сүхбаатар МАН -ын XXVII их хурлын дараа цахим ертөнцөөр «Манай улсын авлигын загалмайлсан эцэг бол Т.Бадамжунай тэргүүтэн. Бадамжунай гэдэг мафи шоронд ороогүй цагт Монголд авлигачид жаргаж, олон түмэн айдас, доромжлол амссаар байх болно» хэмээн жиргэсэн нь нийгмийн дунд жинхэнэ шуугиан дэгдээж амжсан.

Учир нь Ж.Сүхбаатар МАН-ын дараагийн генсекээр томилогдох нь гарцаагүй байсан гэгдэж байсан ч МАН-ын санхүү хариуцсан нарийн бичгийн дарга Т.Бадамжунай бага хурлын гишүүдийг ятгах, хахуульдах замаар түүнийг унагаж, «Үнэн» сонины эрхлэгч Ж.Мөнхбатыг ялуулсан гэх шуум тус намынхан дунд дэгдээд байгаа гэнэ лээ.

Б.Одон