Монгол Улсын 14 дэх Ерөнхий сайд, нэрт эдийн засагч, санхүүч, Сангийн сайд, Төлөвлөгөөний хорооны дарга, Сайд нарын зөвлөлийн дарга зэрэг хариуцлагатай ажил, удирдах албан тушаал хашиж явсан, Монголын төр түмний төлөө нэгэн жарны турш зүтгэсэн Думаагийн Содном өнөөдөр “Чингисийн одон”-гоор шагнагдлаа.  Түүний одон тэмдгийг өнөөдө Монгол Улсын Ерөнхийлөгч Ц.Элбэгдорж морин цагт ёслол хүндэтгэлтэйгээр гардуулан өглөө.

Тэрээр “Чингинс хааны одон”-г хүлээн авсны дараа “Өнөөдөр бүтээн байгуулалт хийж буй Монголын Алт компанид ажиллаж байгаа даа баяртай байдаг. Монгол Улсын Ерөнхийлөгч Ц.Элбэгдорж таны бодлого, үйл ажиллагааны хүрээнд иргэний оролцоог нэмэгдүүлэх, авлига хээл хахуулийг таслан зогсоох, шүүхийг шинэчлэх, төсвийн ил тод байдлыг хангах, төвлөрлийг сааруулах, орон нутагт эрх мэдлийг шилжүүлэх, Монгол соёлоо хамгаалан, дэлгэрүүлэх, олон улсын тавцанд Монгол Улсынхаа нэр хүндийг өргөх талбарт онцгой анхаарч, тууштай зарчимтай ажиллаж байгаад Монгол Улсын Ерөнхий сайдаар ажиллаж явсан хүний хувьд бахархаж байгаагаа илэрхийлье. Монголчууд бид эцэг, өвгөдөөсөө өвлөсөн эх нутаг, газар шороогоо үр ач даа өвлүүлж, эрх чөлөө, тусгаар тогтнолоо хайрлан хамгаалж, улс төр, эдийн засгийн хувьд хүчирхэг улс болох ёстой. Бүтээсэн дээ тайвширч биш бүтээх дээ шамдаж явцгаая. Монгол хүн бүр улс орныхоо ирээдүй хөгжил, язгуур эрх ашгийг дээдэлж, алсын хараа, холын байдалтай байж, өвөр зуураа талцах бус эв эеээ хичээн өөдлөн дэвшихийн төлөө эрвийх дэрвийхээрээ зүтгэцгээе. Би Монгол хүний холч ухаан, уужим сэтгэл, хийморь заяагаар бахархаж явна. Бид бүхний Монгол төрийн сүлд ивээг. Их баярлалаа” гэв.