Монголчууд эрт дээр үеэс хулгай хар мөртэй хэмээн цэрвэж ирсэн. Гэтэл сүүлийн үед хулгай хийдэг хүн борооны дараах мөөг шиг олширчээ. Монгол Улсад жилд 21 мянга гаруй гэмт хэрэг улсын хэмжээнд бүртгэгдэж байна. Эдгээрийн ихэнхийг хулгай, дээрмийн хэрэг эзэлдэг аж. Эд, мал, оюуны гээд асар олон төрлийн хулгай бий. Манай улсад гэмт хэргийн гаралт жил ирэх бүр нэмэгдэж байгаа нь нэг талаараа хууль эрх зүйн орчин дутмаг, нөгөө талаасаа цагдаагийн бүтэц зохион байгуулалт тааруутай холбон тайлбарлаж болох юм. Манай улсад гарч байгаа нийт гэмт хэргийн 60-70 хувь нь шөнө оройн цагаар буюу 20-06 цагийн хооронд үйлдэгдэж байгаа. Тэр ч байтугай сургуулийн насныхан хулгай хийх нь элбэгшлээ.

өыб

Хамгийн сүүлд л гэхэд БГД-ийн есдүгээр хорооны II байрны гаднаас иргэн 34 настай эрэгтэй Б-н Toyota Cresta автомашиныг иргэн 17 настай эрэгтэй нь түлхүүр тааруулан хулгайлсан байжээ. Мөн БЗД-ийн 27-р хорооны иргэн 64 настай эмэгтэй Б-н Мазда Демо автомашиныг 13 настай эрэгтэй Ж нь түлхүүр тааруулан хулгайлсныг БЗД-ийн Цагдаагийн хоёрдугаар хэлтэс илрүүлсэн. Хуруу хумсаа хуйхлан байж олсон хэдэн цаасаа урт гартнуудад алдах энүүхэнд болсон цагт хүн бүр л бие биеэ хардаж сэрдэн дарамттай амьдардаг боллоо. Авсан хүн нэг тамтай, алдсан хүн арван тамтай гэдгийн бодит жишээ та бид болсоор л байна.

йө

Автобусанд явахдаа эд зүйлээ алдаж байгаагүй хүн хуруу дарам цөөхөн байгаа.   Тиймдээ ч хэн, хаанаас, хэзээ, яачих бол гэж эмээн цүнхээ тас зуурсан хүмүүс нийтийн унаанд явдаг нууц биш. Биеэр үйлдэх гурван нүглийн нэг бол хулгай гэдэг. Нийтийн тээврээр хулгай хийдэг нөхдийг “твиксчид” гэх. Тэдний энэ ажил сүлжээ болон хөгжиж, хийх ажилгүй залуус хоногийн хоол, өмсөх хувцасны мөнгөө хэн нэгний халаас тэмтэрч олдог болсон.

й

 Хамгийн эмгэнэлтэй нь хулгай ганцхан хотод байдаг гэвэл эндүүрэл. Монгол Улс тэр чигээрээ хулгайч нарт “бүслэгдчихэж”. Малын хулгайч нарын арга үйлдэл нарийсч, сүлжээнд орсон гэдгийг ч малчид ярьдаг. Хуулийг чангатгаж байж, “сүүлгүй чоно”-нуудтай тэмцэж чадна гэж тэд үздэг ч хууль сахиулах, тогтоох байгууллагынхан хулгай л бол хулгай гэдэг байдлаар ханддагаас малын хулгайч нар даварч, иргэдийг багагүй хохироох болсон.

өй

Нэг нутаг хошуу, айл саахалтын хүмүүс нэгнийхээ малыг хулгайлсан байх нь элбэг тохиолддог. Ер нь юу ч мэдэхгүй хүн мал хулгайлна гэж байхгүй. Тухайн малчны мал хэзээ бэлчээрт гардаг. Ямар үед эзэнгүй байдаг. Аль мал нь тарган, туранхай болохыг эзнээс нь дутуугүй мэддэг танил нь малчдын хотыг харлуулсан байх нь баримтаар нотлогдсон.

й

Харин нийслэлд халаасны хулгайд эд зүйлээ алдлаа гэсэн дуудлага өдөрт хамгийн багадаа 10 удаа ирдэг. Мөн энэ хэмжээний хэргийг Нийслэлийн цагдаагийн байгууллагын хулгайн гэмт хэрэгтэй тэмцэх тасгийн  алба хаагчид илрүүлэн ажилладаг. Ер нь даварсан хулгайч нартай хатуу тооцоо бодохгүй бол дандаа бид хохирсоор байх нь.

йө

Хулгайчийг илрүүлж, ногдуулах шийтгэлээс гадна тэдэнтэй тэмцэх аргаа өөрчлөхгүй бол ариун цагаан хөдөлмөрөөрөө амьдарч яваа  нэгэн нь хохирсоор байх гэж үү.

йыө

П.Наран