Сэлэнгэ аймаг дахь Гаалийн газар буюу Алтанбулагийн боомтын албан хаагчид АТГ-т ханджээ. Тодруулбал, тэд Сэлэнгийн гаалийн газрын орлогч дарга Д.Батбаатарын удаа дараагийн хууль бус үйлдлийн талаарх бичиг баримтуудыг хавсаргасан гомдлыг өчигдөр АТГ, Гаалийн ерөнхий газрын ёс зүйн хэлтэст хүргүүлсэн байна.

Уг гомдолд “Д.Батбаатар нь өнгөрсөн хавар Сэлэнгийн гаалийн газрын орлогч даргын албан тушаалд томилогдсон. Тэрбээр уг албанд томилогдсноосоо хойш хагас жилийн хугацаанд Сэлэнгэ аймгийн гаалийн газрын үйл ажиллагааг доголдуулж үндсэн голдрилыг нь хазайлгалаа. Ингэхдээ Алтанбулаг хилийн боомтод орох ёстой ихээхэн хэмжээний татварын мөнгийг зувчуулж, ажилчдаа ялгаварлан харьцдаг. Тиймээс АТГ-т Алтанбулагийн боомтын албан хаагчдын зүгээс гомдол гаргаж, шалгаж өгөхийг хүсэж байна” хэмээн бичжээ.