Нийслэлийн орон сууцны байрны болон гадна шугам сүлжээний засвар үйлчилгээг хариуцах чиг үүрэгтэйгээр ажилладаг байгууллага бол Орон сууц нийтийн аж ахуйн удирдах газар.

Тэгвэл тус газраас 500 сая төгрөгөөр ажлын байр худалдан авах тендер зарласан байна. Тус байгууллага 2023 онд 60 төрлийн худалдан авалт хийхээр энэ тендер зарласан ч уг төлөвлөгөөгөө ШИЛЭН дансандаа мэдээлээгүй байна. Ер нь тус байгууллага ШИЛЭН ДАНСНЫ тухай хуулиа дагаж мөрддөггүйг сүүлийн хоёр сарын ЗАРЛАГЫН мэдээллээ оруулаагүй байгаагаас харж болно. Төрийн өмчит аж ахуйн нэгжийн ангилалтай үйл ажиллагаа явуулдаг тус байгууллагын хувьд ШИЛЭН ДАНСНЫ хуулиа заавал мөрдөж, биелүүлэх ёстой. Гэвч Ч.Мэндбаяр  даргатай Орон сууц нийтийн аж ахуйн удирдах газар уг хуулийг үл тоож байна. 

Сануулахад, өнгөрсөн жил Ч.Мэндбаярыг албан тушаалаа урвуулан ашиглаж, улсаас их хэмжээний мөнгө завшсан байж болзошгүй хэргийг АТГ-аас шалгаж байсан. Тодруулбал,  коронавируст халдварын нөхцөл байдлаас үүдэн 2020 оны арванхоёрдугаар сарын 1-ээс зарим ААН-үүд, айл өрхүүдийн өрхүүдийн ус, цахилгаан, хогны мөнгийг тэглэсэн. Үүнд шаардлагатай мөнгийг  Эрдэнэт үйлдвэр санхүүжүүлсэн юм. Гэтэл Ч.Мэндбаяр нь “Орон сууц нийтийн аж ахуйн удирдах газар” ОНӨААТҮГ-ынхан айл өрх, аж ахуйн нэгжүүдийн цэвэр бохир усны нэхэмжлэл дээр илүү бичилт хийж, төрөөс их хэмжээний мөнгө завшсан хэргээр АТГ-т шалгагдаж байв. 

П.ГОО