Ерөнхий сайд Зэвсэгт хүчний анги салбарт удаа дараа харамсалтай үйл явдал гарч байгаа учраас Хүний эрхийн үндэсний комисстой хамтран хяналт, шалгалт хийх Ажлын хэсэг байгуулж, шалгалтын дүнгээ Засгийн газарт танилцуулахыг үүрэг болгосон. 

Энэ дагуу  Батлан хамгаалахын сайдын зөвлөл хуралдаж хэд хэдэн Ажлын хэсэг байгуулан, тодорхой арга хэмжээ авахаар болжээ.

Тодруулбал, Зэвсэгт хүчний 326 дугаар ангид хугацаат цэргийн алба хаагчдын эцэг, эхчүүдээс гаргасан санал хүсэлтийг яаралтай судлан шийдвэрлэх, хугацаат цэргийн алба хаагчдын алба хааж буй ахуй нөхцөлийн байдалд бодит дүгнэлт хийж, нөхцөлийг сайжруулах, алба хаагчдын эрүүл мэндийн асуудалд онцгой анхаарч бүх ангиудад үзлэгт хамруулах ажлыг зохион байгуулахаар болсон байна.

Мөн Эрүүл мэндийн яамтай хамтран зохион байгуулах, цэрэг татлагатай холбоотой дүрэм, журмуудад өөрчлөлт оруулж, ажлын уялдаа холбоог сайжруулах, зэвсэгт хүчний хэмжээнд хугацаат цэргийн албанд татагдсан дайчдын албаа хаах эрмэлзлэлийг дэмжихэд чиглэсэн зорилтот үйл ажиллагааг зохион байгуулах, дээрх ажлуудыг яаралтай зохион байгуулах үүргийг Ажлын хэсгийн дарга нарт үүрэг болгосон бөгөөд олон нийтэд нээлттэй, ил тод мэдээлж ажиллахыг ч сануулсан байна.