УИХ-ын чуулганы өнөөдрийн хуралдааны эхэнд Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуулийн төсөл болон хамт өргөн мэдүүлсэн хууль, тогтоолын төслүүдийг хэлэлцэх эсэх асуудлыг хэлэлцэж байна. 

Хуулийн төсөлд Улаанбаатар хотод замын хөдөлгөөний төлбөртэй бүс, түүний хилийн зааг, цагийн хязгаарыг тогтоож, төлбөртэй бүсэд тогтоох төлбөрийн хэмжээг Нийслэлийн ИТХ тогтоохоор тусгажээ. Сүүлийн үед нийгэмд такси үйлчилгээтэй холбоотой олон хэргүүд гарах болсныг Д.Амарбаясгалан сайд дурдсан. Цагдаагийн байгууллагын гэмт хэргийн мэдээллийн санд сүүлийн 5 жилд такси үйлчилгээтэй холбоотой нийт 3119 гэмт хэрэг бүртгэгдсэнээс дийлэнх нь буюу 2940 нь нийслэлд гарчээ. Үүнээс 2636 гэмт хэргийг таксины жолооч үйлдсэн байгааг онцгой анхаарч цэгцлэх зайлшгүй шаардлагатай болсныг тэрбээр онцлоод, такси үйлчилгээг хуульд заасан нөхцөл, аюулгүй байдлын шаардлагыг хангасан этгээд тусгай зөвшөөрөлтэйгөөр эрхлэх, түүнд тавих хяналт зохицуулалтыг бий болгохыг зорьсон хэмээн мэдээлсэн.

Сайд Д.Амарбаясгалан, Замын хөдөлгөөний түгжрэлийг бууруулах хүн амын төвлөрлийг сааруулах, орчны бохирдлын асуудлыг шийдвэрлэх оновчтой шийдэл нь гэр хорооллыг инженерийн дэд бүтцээр хангах, дахин төлөвлөн барилгажуулах явдал юм. Нийслэл Улаанбаатар хотын хэмжээнд 2021 оны байдлаар нийт 412.5 мянган өрх амьдарч байгаагаас 51.4 хувь нь буюу 212 мянган өрх орон сууцанд, үлдсэн 48.6 хувь буюу 200 мянган өрх гэр хороололд амьдарч байна. Нийслэлийн хүн амын тал хувь нь гэр хороолол буюу инженерийн дэд бүтцийн хангамжгүй, агаар, хөрсний бохирдолтой нөхцөлд амьдарч байна. Хуулийн төсөлд нийслэл хотын хөгжлийн ерөнхий болон хэсэгчилсэн ерөнхий төлөвлөгөөнд тусгагдсан дэд төвүүдийн байршилд гэр хорооллыг орон сууцжуулах нийгмийн зайлшгүй хэрэгцээг үндэслэн газар чөлөөлөх үндэслэлийг нарийвчлан тодорхойлж, газар чөлөөлөлтийн нөхөх олговрыг газрыг газраар дүйцүүлэн олгох, газрыг үл хөдлөх болон хөдлөх эд хөрөнгөөр, газрыг нөхөх олговрын мөнгөн зардлаар худалдан авах болон бусад боломжит хэлбэрээр олгож болохоор тусгалаа. Хотын хөгжлийн ерөнхий болон хэсэгчилсэн ерөнхий төлөвлөгөөнд заасны дагуу Улаанбаатар хотын гэр хорооллын дахин төлөвлөлтийн төслүүдийг эрчимжүүлж, орон сууцжуулах төслийг хэрэгжүүлсний үр дүнд нийгэм, эдийн засаг, байгаль орчны нөлөөллийн талаар үр дүн гарч нийслэлийн иргэд ая тухтай амьдрах орчин нөхцөлийг бүрдэнэ гэж үзэж байна. Нийслэл Улаанбаатар хотын замын хөдөлгөөний түгжрэл төвлөрлийн алдаанд нөлөөлж байгаа хүчин зүйлүүдийг цогцоор шийдвэрлэх зорилгоор нийт 25 хуулийн төсөлд холбогдох өөрчлөлт оруулахаар багцаар нь боловсруулсан гэлээ.

Хуулийн төсөлтэй холбогдуулан гишүүд асуулт асууж хариулт авч байна. 

Энэ үеэр УИХ-ын дарга Г.Занданшатар "Өвлийн эрчим хүчний ачааллын үед хязгаарлалт хийхээр өөр аргагүй нөхцөл байдал үүсэж байна гэж Эрчим хүчний яам мэдээлж байна. Агаарын бохирдол түгжрэл зэргийг тооцоод сурагчдыг 12, 1 сард амрааж, зун намрын сард хичээллүүлэх талаар судалж үзвэл ямар вэ? Долдугаар сарын 1 хүртэл хичээллэж болж байна. Наймдугаар сарын 1-ээс хичээл эхлүүлж болж байна. Хүүхдийн эрүүл мэнд, аюулгүй байдал талаа бодох. Нийслэлд үйл ажиллагаа явуулж байгаа төрийн байгууллагуудын автомашины хэрэглээг хязгаарлах саналыг судалж үзээрэй" гэсэн саналыг гаргалаа. 

УИХ-ын гишүүн Н.Учрал: 12 мянган айлыг орон сууцжуулбал, Х.Нямбаатар даргад  хөшөө босгож өгөхөөс өөр аргагүй. Дэмжихээс өөр гарц байхгүй. Баянхошуу, Сэлбэ дэд төвийг байгуулахад газар чөлөөлөлтөд ямар бодлого барих вэ?  

Нийслэлийн Засаг дарга Х.Нямбаатар: Бидний санхүүгийн схемд "НОГООН БОНД"-ын харилцаа орж ирж байгаа. Газрыг албадан гэхээсээ илүү иргэдтэй ойлголцоно. Хамгийн эхэнд газрыг бэлэн мөнгөөр солих, шууд байраар солих, газар дээр босох орон сууцанд амьдрах гурван хувилбараас сонголт хийлгэнэ. 

УИХ-ын гишүүн Б.Баттөмөр: Шөнийн түгээлтийг бий болгох, худалдааны төвүүд шөнө бараагаа татдаг байх боломжтой юу? 

Нийслэлийн Засаг дарга Х.Нямбаатар: Түгжрэлийг бууруулахтай холбоотойгоор Шөнийн түгээлтийн менежментийг хийхээр хувийн ААН-үүд хамтарч ажиллахаар судалж байна. Үүнийг төгс хэрэгжүүлж байгаа CU, GS25 гэх хоёр байгууллага шөнийн цагийн түгээлтийн схемыг танилцуулсан. Худалдаа аж үйлдвэрээс бидэнд санал танилцуулна. Шөнийн цагийн үйлчилгээ үзүүлж байгаа ААН-үүдэд санхүүгийн дэмжлэг үзүүлэхээр ярилцаж байна. Мөн хүнсний захууд, худалдаа үйлчилгээний төвүүд өглөө эрт онгойж, орой эрт хаадаг байх зохицуулалтын ажил яригдаж байна. Бага тойруугийн 50 га-д МУ-ын бүх үйл ажиллагаа явагддаг. 5 зүгээс өглөө ирээд орой буцаж байна.