Хөдөлмөр нийгмийн хамгааллын салбарт процессын дахин инженерчлэл хийжээ. Энэ талаар Засгийн газрын хэрэг эрхлэх газрын дарга Д.Амарбаясгалан "Процессын дахин инженерчлэлээр төр үйлчилгээний байгууллагын нэгэн адил иргэндээ хүрч үйлчилж чаддаг байх тогтолцооны өөрчлөлт хийхийг зорьсон. Шинжилгээний баг 32 хүний бүрэлдэхүүнтэй ажиллаж, салбар дахь эрсдлийг тооцож гарсан. Урьдчилсан байдлаар Хөдөлмөр нийгмийн хамгаалын салбарт 1900 гаруй төрлийн эрсдэл байна. Хөдөлмөр, халамж, НД-ын үйлчилгээ иргэн бүрийн үйлчилгээ авдаг үйлчилгээ. Эдгээр үйлчилгээний 70 орчим хувь нь уламжлалт цаасан харилцаан дээр тогтдог. 

Жишээ нь, төрөлхийн хөгжлийн бэрхшээлтэй иргэн хоёр жил тутамд очиж группээ сунгуулдаг. Энэ байхгүй байх боломжтой.Хөдөлмөр, нийгмийн хамгааллын салбарт процессын дахин инженерчлэл хийсэн баг "Ийм төрлийн процесс төрд байх ёстой юу? Ийм төрлийн процессыг төр өөрөө хийх ёстой юу? Энэ төрлийн процессыг хүн хийх хэрэгтэй" гэсэн гурван асуултад хариулт өгөхөөр ажилласан" гэлээ. 

ЗГХЭГ-ын дэд дарга буюу Засгийн газрын Хяналт хэрэгжүүлэх газрын дарга Б.Баасандорж “Иргэн төрийн байгууллагаас үйлчилгээ авахдаа нэгээс илүү албан хаагчийг дамжих ёсгүй.

Төрийн албан хаагчийн сэтгэл хангамжийг нэмэгдүүлэх, ил тод байдал, амар хялбар байх, түргэн шуурхай байдлыг бий болгох үүднээс ХНХЯ, НДЕГ, ХХҮЕГ-т 211 үйлчилгээнп процессын дахин инженерчлэл хийлээ.

Хөдөлмөр нийгмийн хамгааллын салбарын 211 үйлчилгээнд 1999 бодит эрсдэл байна. Иргэнд үзүүлэх үйлчилгээ хүнд сурталтай, олон шат дамжлагатай байна.

Иргэн нийслэлийн есөн дүүргээс үйлчилгээ авахад 23 000- 34 000 төгрөгийн зардал гаргаж байна. Орон нутагт 54 000-108 000 төгрөгийн зардал гаргаж, иргэн тэтгэвэрээ тогтоолгож, ажилгүйдлийн тэтгэмж авах зэрэг үйлчилгээг авч байна.

НДЕГ, ХХҮЕГ өнөөдрийг болтол харьяалал харгалзаж үйлчилгээ үзүүлдэг.  Үүнийг халж, харьяалал харгалзахгүй үйлчилгээ үзүүлж, иргэд хүссэн газраасаа үйлчилгээ авдаг болно.

Сүүлийн жилүүдэд цахимжилт эрчимтэй явагдсан. Гэтэл нийгмийн даатгалын 96 үйлчилгээний 70 хувь, халамжийн 72 үйлчилгээний 68 хувь нь иргэдээс цаасан материал шаардсаар байна. Процессын дахин инженерчлэлийн хүрээнд энэ хоёр байгууллагаас үйлчилгээ авах иргэд иргэний үнэмлэхээ үзүүлэхэд л хангалттай болж байна.

Нийгмийн даатгал, халамжийн салбарын 211 үйлчилгээнд процессын дахин инженерчлэл хийснээр

-Төрийн системд байгаа мэдээллийг иргэдээс цаасаар шаардахгүй

-Төрийн үйлчилгээнээс баримт бүрдүүлэх 36 шат дамжлагыг 6 болгож буурууллаа" гэдгийг мэдээлэв.