УИХ-ын чуулганы үдээс хойших хуралдаан эхэллээ. Хуралдааны эхэнд УИХ-ын дарга Г.Занданшатар НӨАТ-ын буцаан олголтын хоёр хувийг тав болгох асуудлыг Төсвийн байнгын хороогоор хэлэлцүүлэхээр шилжүүлсэн гэх мэдээллийг өглөө. 

Тэрбээр "Үндсэн хуульд Монгол Улсад засгийн бүх эрх ард түмний мэдэлд байна. Монголын ард түмэн төрийн үйл хэрэгт шууд оролцож, мөн сонгож байгуулсан төрийн эрх барих төлөөлөгчдийн байгууллагаараа уламжлан энэхүү эрхээ эдэлнэ. Мөн төрийн байгууллага, албан тушаалтанд өргөдөл, гомдлоо гаргаж шийдвэрлүүлэх эрхтэй. Төрийн байгууллага, албан тушаалтан нь иргэдийн өргөдөл, гомдлыг хуулийн дагуу шийдвэрлэх үүрэгтэй гэж заасан байдаг. 

УИХ-ын тухай хуулийн 39 дүгээр зүйлийн 1.Үндсэн хуулийн Гуравдугаар зүйлийн 1 дэх хэсэгт заасны дагуу Монголын ард түмэн төрийн үйл хэрэгт шууд оролцож, мөн сонгож байгуулсан төрийн эрх барих төлөөлөгчдийн байгууллагаараа уламжлан энэхүү эрхээ эдлэхдээ тодорхой асуудлыг шийдвэрлүүлэх талаар асуулт асуух, санал өгөх эрхээ Улсын Их Хурлын албан ёсны санал авах цахим хуудас, гар утас, хөдөлгөөнт төхөөрөмжид зориулсан Улсын Их Хурлын албан ёсны программ хангамж /цаашид “цахим хуудас” гэх/-аар дамжуулан хэрэгжүүлж болно гэсэн байдаг. 

Эдгээр хуулиудын дагуу 2023 оны 10 дугаар сарын 27-ны өдөр гэхэд  https://d.parliament.mn/ -д 489 санал ирсний 200 гаруй нь НӨАТ-тай холбоотой байсан. Мөн МҮХАҮТ, СЕО клуб зэрэг ТББ-ууд олон нийтийн зүгээс албан бичгээр санал ирсэн. Иймээс  НӨАТ-ын буцаан олголтын хэмжээг 5 хувь болгон нэмэгдүүлэх санал асуулга явуулж эхэлсэн. Зургаан хоногийн дотор 100 гаруй мянган иргэн дэмжсэн. Энэ бол парламентын түүхэнд иргэд анх удаа иргэд анх удаа төрийн хэрэгт цахимаар шууд оролцсон үйл явдал боллоо. Иймээс Дэгийн тухай хуулийн дагуу санал 100 мянгад хүрсэн бол УИХ-ын дарга чуулганд мэдээлж, холбогдох байнгын хороонд шилжүүлэхээр заасан. Иймээс НӨАТ-ын буцаан олголтын хэмжээг 5 хувь болгон нэмэгдүүлэх санал асуулгын үр дүнг хэлэлцэхээр Төрийн байгуулалтын байнгын хороонд шилжүүлж байна" гэлээ. 

П.ГОО