АТГ-аас хотын ерөнхий архитектор Ц.Тулгыг саатуулжээ. Тодруулбал, АТГ-ын Мөрдөн шалгах хэлтсийнхэн нийслэлийн ерөнхий архитектор бөгөөд Хот байгуулалт, хөгжлийн газрын дарга Ц.Тулга, Хотын стандартын газрын дарга С.Төмөрдулам, тус газрын барилга, байгууламжийн ашиглалт, бүртгэлийн ахлах мэргэжилтэн Ц.Тогтохбуян, Хот төлөвлөлт, ерөнхий төлөвлөгөөний газрын Барилга, байгууламжийн хэлтсийн дарга асан Т.Эрдэнэтуяа, Хотын инженерийн байгууламжийн хэлтсийн дарга асан Ц.Нямцэвээн, Хотын стандарт, хяналтын газрын эрх бүхий албан тушаалтан М.Дунгармаа нарын гэр, албан өрөөнд нь нэгжлэг хийсэн юм.

Ийнхүү мөрдөн шалгах ажиллагаа эхэлсэнтэй холбогдуулан нэр дурьдагдсан дарга нарын хөрөнгө орлогыг мэдээллийг цувралаар хүргэхээр бэлтгэлээ. 

Нийслэлийн ерөнхий архитектор бөгөөд Хот байгуулалт, хөгжлийн газрын дарга Ц.Тулга

 Б.Тулга нь 5 жилийн өмнө Нийслэлийн хот төлөвлөлт, ерөнхий төлөвлөгөөний газар ажиллаж байхдаа жилийн 13 сая төгрөгийн орлого олж байжээ. Харин таван жилийн дараа буюу өнгөрсөн онд жилийн 25 сая төгрөгийн орлого олжээ. Гэхдээ энэ орлогоос нь хэд дахин илүү мөнгийг дансандаа хуримтлуулж чадсан байгаа юм. Тодруулбал, Б.Тулга 2021 онд 192 сая төгрөгийн хадгаламжтай байсан бол  2022 онд НЭГ ТЭРБУМ төгрөгт хүрч огцом нэмэгджээ.

Төрийн албанд тогтвор суурьшилтай ажиллаж, удирдах голдуу алба хашсан түүний үл хөдлөх хөрөнгийн үнэлгээ ч өндөр. Ц.Тулгынх нэг амины, гурван нийтийн орон сууцтай, нэг үйлчилгээний газартай. Эдгээр нь НЭГ тэрбум 579 сая төгрөгийн үнэлгээтэй. Мөн эзэмших эрхтэй ДӨРВӨН газартай. Жирийн нэг иргэнд бол 4 байтугай нэг газар ч олдохгүй байсан цаг үе. Харин Ц.Тулгад бол 4 байна.

Ц.Тулга нь Улсын их дэлгүүр, МЦХ-ноос хувьцаа эзэмшдэг хувьдаа гурван компанитай нэгэн юм.