Хууль зүй дотоод хэргийн сайд Х.Нямбаатар Улаанбаатар хотын захирагч боллоо.

Шинээр томилогдож буй Нийслэлийн Засаг дарга бөгөөд Улаанбаатар хотын Захирагч, түүний удирдлагын багт "Өнгөрсөн 30 жилийн хугацааны газрын наймааны асуудал, зөвшөөрөлгүй баригдсан барилгуудын хууль бусаар олгогдсон техникийн зөвшөөрлийн асуудлууд, цаана нь нуугдаж буй авлигын асуудлыг цэгцлэх шаардлагатай. Үерийн далан хааж барьсан авлигын цамхагууд, төмөр замын бүсэд сүндэрлэсэн тансаг хорооллууд, замын хөдөлгөөний гольдролыг бөглөж боссон худалдааны төвүүдийн цаана хэдхэн хүн баяжиж, нийт нийслэлчүүд эрхээ зөрчүүлж хэрхэвч болохгүй. Нийслэлчүүд алдагдсан боломжийн өртгөө, алдагдсан ногоон байгууламжаа, алдагдсан цэцэрлэг, сургуулиа нэхэмжлэх бүрэн эрхтэй. Энэхүү системийн авлигын тогтолцоог илчлэх ажиллагаанд ил болон далд хэлбэрээр саад учруулахгүй байхыг улстөрчид, нийслэлийн албан тушаалтнуудад хатуу сануулъя!" гэх үүрэг даалгаврыг өгсөн. 

Ийнхүү хууль зүйн салбарыг толгойлж байсан сайд 30 жилийн алдаа завхралын үүр уурхай болсон нийслэл хотын түм буман асуудлыг цэгцлэх үүрэг даалгавар авлаа. Өнөөдрөөс шинэ хотын дарга албан үүргээ хэрэгжүүлж эхэлнэ. Түүний нэн тэргүүнд шийдэх ёстой ажил бол өнгөрсөн зун нийслэл хотыг үерт автуулах дөхсөн тансаг хороолол, худалдааны төвийг цэгцлэх. Мэдээж энэ бол түүнийг тамгаа гардах мөчид өгсөн Ерөнхий сайдын үүрэг даалгавар. 

Өнгөрсөн наймдугаар сард Д.Сумъяабазар дарга Улаанбаатар хотын барилга байгууламжийн өнөөгийн нөхцөл байдал, үерийн хамгаалалтын бүсийн талаар авч хэрэгжүүлэх арга хэмжээгээ танилцуулахдаа "Aqua Garden" төсөл, "S Outlet" дэлгүүрийн барилгыг нураах захирамж гаргаснаа мэдэгдсэн. Мөн Засгийн газраас Сэлбэ гол дагуух онцгой хамгаалалтын бүсийн 1887 нэгж талбар газрыг улсын тусгай хэрэгцээнд авах шийдвэрийг гаргасан. Энэ дагуу S Outlet-ийн барилга, Aqua Garden төслийн хоёр блокыг буулгаж, Сэлбэ голын үерийн хамгаалалтын бүсийн газрыг чөлөөлөхөөр болсон. Гэвч Д.Сумъяабазар дарга цаасан дээрх захирамжаа бодит ажил хэрэг болгож чадаагүй.

Харин одоо Х.Нямбаатар уг асуудлыг хэрхэн шийдвэрлэхийг л харах үлдэж байна. 

П.ГОО