Өнгөрсөн жилийн эхээр иргэн Б.Цэцэгт "Сэлбэ Сэргэлт" төслийн нэгжийг хариуцуулахаар болсон нь нийгмийн сүлжээнд шүүмжлэл дагуулсан.  Тухайн үед төслийг 3,1 тэрбум төгрөгөөр хэрэгжүүлэхээр төлөвлөж байв. Удалгүй нийслэлийн иргэдийн төлөөлөгчдийн хурал төслөө эргүүлэн татсан.

Үүний дараа Улаанбаатар хотын замын хөдөлгөөний ачааллыг тэнцвэржүүлж, түгжрэлийг бууруулж, Туул, Сэлбэ, Дунд голын орчинд олон нийтийн соёл, амралтын тохилог орчныг бүрдүүлэх зорилтуудын хүрээнд “Сэлбэ Сэргэлт” төслийг боловсруулсан.  Тэгвэл одоогоор уг төсөлд 3.1 тэрбум төгрөг зарцуулжээ.

Тодруулбал, Р.Амартүвшин даргатай Хот төлөвлөлт, судалгааны институт найман удаагийн гүйлгээгээр 7 компани руу 3.1 тэрбум төгрөг шилжүүлжээ. 

 

• Сэлбэ сэргэлт ажлын хүрээнд усны барилга байгууламжийн ТЭЗҮ зураг төсөл ажлын урьдчилгаанд 927 сая төгрөгийг Престиж- инженеринг компани руу шилжүүлсэн байна. Тус компани нь Шаравын Ганзориг гэх хүний эзэмшилд байдаг. Ш.Ганзориг нь Монголын усны үндэсний төвийн дэд захирлаар ажиллаж байжээ.

• "Сэлбэ сэргэлт" ажлын хүрээнд геодези байрзүйн зураглал ажлын урьдчилгаа 232 сая төгрөг Кадсүрвэй компани руу шилжүүлсэн байна. Тус компанийн захирлаар МУ-ын зөвлөх инженер  С.Ганчимэг ажилладаг. 

• "Сэлбэ сэргэлт" ажлын хүрээнд инженер геологийн судалгааны зураглал ажлын урьдчилгаа 172 сая төгрөгийг Сойлтрейд компани руу шилжүүлсэн бөгөөд уг компанийн захирлаар А.Батсайхан ажилладаг байна. 

• "Сэлбэ сэргэлт" ажлын хүрээнд Байгаль орчны төлөв байдлын үнэлгээ болон Байгаль орчны нөлөөллийн нарийвчилсан үнэлгээ хийх ажлын урьдчилгаа 119 сая төгрөгийг гадаад худалдаа, газар тариалан Хүнсний бөөний барааны чиглэлээр үйл ажиллагаа явуулдаг И.Бямбахүү захиралтай Би Жи Эм дистрибьюшн рүү шилжүүлсэн байна. 

• "Сэлбэ сэргэлт" ажлын хүрээнд авто зам, гүүрийн инженерийн нарийвчилсан зураг төслийн ажлын урьдчилгаанд 1,7тэрбум төгрөгийг Эм Си Пи Си Жи Ар ХХК руу шилжүүлсэн байна. Энэ компани Монгол 999 үндэсний нэгдэлд харъяалагддаг. Монгол 999 нэгдлийн захирлаар Т.Наранбулаг ажилладаг байна. 

• "Сэлбэ сэргэлт" ажлын хүрээнд Олимпын гүүр, Сонсголонгийн гүүр хүртэлх гүүрэн байгууламж болон автозам, дугуйн зам, явган хүний замын талбайн инженер- геологийн судалгааны ажлын урьдчилгаа 104 сая төгрөг зэрэг Л.Ганзориг даргатай Инжгеотех ХХК рүү жилүүлжээ.

• "Сэлбэ сэргэлт" ажлын хүрээнд ОУ-ын тохижилтын ажлын судалгаа, тайлан гаргахад 64 сая төгрөгийг Ворлдбридж компани руу шилжүүлсэн байна. 

“Сэлбэ сэргэлт” төсөл нь техник, эдийн засгийн үндэслэл, зураг төсөл боловсруулах болон барилга угсралтын ажлыг гүйцэтгэх гэсэн 2 үндсэн үе шатаар хийгдэнэ. Геодези, инженер геологи, байгаль орчны үнэлгээ, ерөнхий төлөвлөгөө, тохижилт, зам, гүүр, далан, инженерийн шугам сүлжээ, усны барилга байгууламжийн зураг төслийн ерөнхий гүйцэтгэгчээр Нийслэлийн “Хот төлөвлөлтийн судалгааны институт” ОНӨААТҮГ ажиллаж байгаа юм.