Манай улсад айлчлал хийж буй ОХУ-ын Төрийн думын дарга Вячеслав Володин айлчлалынхаа эхний өдөр л дуулианы эзэн болов. Монгол Улсын УИХ-ын дарга Г.Занданшатар түүнийг угтан, хамтдаа Чингис хааны хөшөөний дэргэд ирэхэд Г.Занданшатар хааны хөшөөнд мэхийн ёсолсон бол Вячеслав Володин хүндэтгэл үзүүлээгүй нь олон нийтийн сүлжээнд ихээхэн шуугиан тарьсан юм. 

Нэг хэсэг нь "Ромын пап ч хүртэл тэргэнцэрээсээ босож хүндэтгэл илэрхийлсэн байхад Володин монголчуудыг үл тоолоо" хэмээсэн бол нөгөө хэсэг нь "өөр улсын зочин гадны хааны хөшөөнд бөхийх албагүй" гэх зэргээр "өмөөрч" байв. Хэдийгээр гадаадын бүхий л зочин тухайн улсын хааны хөшөөнд хүндэтгэл илэрхийлэх ёстой гэсэн журам цаасан дээр бичигдээгүй ч аль ч улсын зочид төлөөлөгчид айлчилж буй орныхоо ёс уламжлалыг хүндэтгэдэг нь дипломат ёсны нэгээхэн хэсэг. Тиймдээ ч энэ уламжлалыг уландаа гишгэсэн гэж Володиныг буруутгах хүмүүс зөвхөн монголчууд байсангүй, Оросын сайтууд болон олон нийтийн сүлжээгээр ч Володины үйлдлийг ихээхэн шүүмжилжээ. 

"Архи ууж, Калинка бүжиглэх гэж байгаа бол хамаа алга. Харин албан ёсны төлөөлөгчдийн айлчлалыг зохион байгуулна гэдэг өөр хэрэг. Ийм ажил зохион байгуулж чадахгүй байна. Айлчлалын нарийн ширийнийг бүгдийг нь тохиролцдог протокол гэж нэг юм бий. Чингис хааны хөшөөнд мэхийх үү эсвэл мэхийхгүй байх уу гэдгээ уулзалтын протоколыг боловсруулах шатанд л шийдэх ёстой. Эрүүл саруул ухаантай, хүлээн авч буй тал зочноо ичгэвтэр байдалд оруулахгүй. Хожим дуулиан гаргахгүй байхын тулд урьдаас бүхнийг шийдэж болдог. Гэхдээ Оросын протоколын алба "шартчихаж". Тэд юун нарийн ширийнийг бодох манатай байж. Ингээд л гэнэтийн таагүй байдал гарчээ. Харамсалтай нь бүхий л тал дээр зэрлэг, мэргэжлийн бус байдал гаргадаг нь орчин цагийн Оросын нэрийн хуудас болчихсон" гэж Оросын улс төрийн блогчин, шинжээч Анатолий Несмиян өгүүлжээ. 

Оросын хараат бус сайтууд шинжээч Анатолий Несмияны мэдэгдлийг иш татан Володины үйлдлийн талаар бичсэн бол ВКонтакте олон нийтийн сүлжээ, Дзен платформ зэрэг олон талбарт блогчид болон олон нийт Володины үйлдлийг шүүмжилсэн байна. 

Тухайлбал, Дзен платформ дээр 38,1 мянган дагагчтай "Небрехня, т.е. факты!" хуудас Вячеслав Володин Чингис хааны хөшөөнд хүндэтгэл үзүүлээгүйтэй холбоотойгоор байр сууриа дараах байдлаар илэрхийлжээ. 

"Монголд дипломат шуугиан болсон гэлцэнэ. Оросын эрх мэдлийн систем дэх дөрөвдүгээр хүн болох ноён Володин Ертөнцийг донсолгогч, Монголын төрт улсыг үүсгэн байгуулагч Чингис хааны хөшөөнд мэхийн ёслоогүй аж.  Зураг дээрээс харахад Занданшатар хөшөөнд мэхийн ёсолсон бол Володин тэгсэнгүй. Бидний өмнө бардам орос, бүр тодруулбал Эртний Орос орныг Чингисийн үр сад байлдан эзлэж байсныг мартаагүй "Нэгдсэн Орос" (shuud.mn: Оросын эрх баригч намыг хэлж байна)-ын гишүүн зогсож байгаа нь илт. Тэр тэгээд л эртний түүхэн гомдлынхоо өшөөг авахаар шийдсэн нь сайхан тайван нөхцөлд дипломат дуулиан дэгдээж, монголчуудыг гомдоохоор шийдэж орхиж. Ийм хайнга зан үргэлж байсан уу гэвэл үгүй. Жишээ татъя, ЗХУ руу дайрсан Маннергейм маршалаас үүдэлтэй түүхэн гомдол байлаа гээд манайхан Финландад очихдоо хүндэтгэл үзүүлж л байсан, Польшид ч тэр. Гэтэл одоо тэр польшууд, финландчууд чинь хаана байгаа юм? Оросын холбоотнуудын дунд тэднийг олж харахгүй л байна шүү. Харин Монгол Улс бидэнд ямар ч муу юм хийгээгүй, хийхээр ч зэхээгүй байна. Манай албан тушаалтнуудын байр байдлаас харахад тэд оргүй хоосон газраас л дуулиан шуугиан дэгдээж чаддаг улс юм" 

Вячеслав Володины айлчлалын эхний өдөр гаргасан үйлдэл Оросын хамгийн түгээмэл ашиглагддаг ВКонтакте сүлжээнд ч ихээхэн маргаан дагуулжээ. Володин Чингис хаанд хүндэтгэл үзүүлээгүй тухай пост дор хэрэглэгчид "Володин хүчтэй хүн. Мэхийх албагүй", "Эн зэрэгцэх хүндээ бөхийдөггүй. Харилцан хүндлэл үзүүлэхэд л болно", "Энэ бол дипломат ёсыг уландаа гишгэсэн хэрэг", "Бид Алтан Ордны эрхшээлд олон зуун жил байсан. Чингис хаанд мэхийвэл өвөг дээдэс рүүгээ нулимсантай адил болно", "Монголд ингэж хандаж болохгүй, дайны жилүүдэд яаж туслаж байлаа даа" гэх зэргээр олон талт байр суурийг илэрхийлсэн бол "Володин ОХУ, Монголын харилцааг дараагийн шатанд гаргах" тухай мэдээллийн дор "Бид Монголтой сайхан харилцаатай байх ёстой", "манайд үлдсэн цорын ганц үнэнч холбоотон" гэх зэргээр дэмжсэн утгатай сэтгэгдлүүдийг үлдээжээ. 

Эх сурвалж: dzen.ru, VK.com, Telegram

Г.Бямбасүрэн