Төлөвлөлтгүй, төлөвлөдөггүй нийслэлийн үе үеийн удирдлагуудын алдаагаар иргэд жилийн дөрвөн улиралд стресс уур бухимдалтай нүүр тулах болсон. 

Яг одоогоор бол үер усны аюултай зуны улирал дуусаж, замын түгжрэлтэй гэх том асуудалтай нүүр туллаа. Удахгүй замын түгжрэл дээр хальтиргаа гулгаа нэмэгдэнэ. Жилийн жилд л уг асуудлуудтай нийслэлчүүд нүүр тулдаг ч гарах гарц гаргалаа олоогүй л байна. Метро, дүүжин тээвэр, LRT гэх мэт мэт олон төсөл хөтөлбөрүүд цаасан дээр олон оныг үдсэн.

Иймээс нийслэлчүүд өвлийн улиралдаа уламжлалын дагуу бэлдэж, цас хайлуулах бодисоо эхний ээлжинд авна. Өөр боломж, арга байхгүй. Нийслэлийн төсвөөс багагүй хөрөнгө зарцуулдаг зүйл бол цас хайлуулах бодис, давс авах уламжлалт үйл ажиллагаа. Өнөө жил НЗТГ-аас хальтиргаа гулгаа арилгах зориулалтын бодис худалдан авахаар эхний тендерээ зарласан байна. Тендерийн төсөвт өртөг 1.8 тэрбум төгрөг байх юм. Санхүүжилтын эх үүсвэр нь нийслэлийн төсвийн хөрөнгө байхаар тендерийн баримт бичигт тусгагджээ.