Португалийн Сан-Лоренсу-ду-Байрру хотод есдүгээр сарын 10-ны өдөр дарсны үйлдвэрт осол гарсны улмаас хотын гудамжаар "дарсан гол" урсжээ. Энэ талаар Daily Mail сонин мэдээлсэн байна.

Эх сурвалжийн мэдээлснээр, дарсны үйлдвэрийн хоёр нөөцлүүр сав гэнэт эвдэрсний улмаас Levira дарс, архины үйлдвэрийн 2,2 сая литр улаан дарс асгарч, хотын гудамжаар урссан байна. Их хэмжээний дарс урссаны улмаас ойролцоох Сертима гол руу цутгаж, экологи сүйдэхээс сэргийлэн, "дарсан гол"-ын урсацыг өөрчилсөн гэнэ. Хотын гал сөнөөх алба урсацыг хааж, голоос холдуулан, талбай руу чиглүүлжээ.

Энэ явдлын дараа Levira компани уучлалт гуйж, бохирдсон хэсгүүдийг цэвэрлэх, хор уршгийг арилгах ажлын бүх зардлыг хариуцна хэмээн мэдэгдсэн байна. Түүнчлэн тусгай бригад гарган хор уршиг арилгах ажлыг нэн даруй хийж гүйцэтгэнэ хэмээн амлажээ.

Г.Бямбасүрэн