Оросын иргэд улсдаа бүртгүүлсоэн хувийн автомашинаар Европын холбооны гишүүн орнуудын нутаг дэвсгэр рүү зорчих боломжгүй болжээ. Энэ талаар Мосва таймс сонин мэдээлсэн байна. 

Эх сурвалжийн мэдээлснээр, Украин дахь дайны улмаас ОХУ-ын эсрэг тавьсан хориг арга хэмжээний дагуу Орост бүртгэгдсэн автомашиныг ЕХ руу нэвтрүүлэх боломжгүй, "хууль бус импорт" гэж үзэх аж. Энэ хориг бүхий л суудлын автомашин, түүнчлэн, 10-аас доош хүн тээвэрлэх зориулалттай бусад тээврийн хэрэгсэлд ч хамаарах юм байна.

Оросын дугаартай автомашинуудыг хурааж эхэлсэн талаарх мэдээлэл тавдугаар сараас гарч эхэлсэн юм. Тухайн үед Германд ийм тохиолдлууд гарсан бөгөөд Украин руу ОХУ халдсаны хариуд 2022 оны 10 дугаар сард авч хэрэгжүүлсэн Европын холбооны хоригийн наймдугаар багцад заасны дагуу машиныг хураана гэж Германы гаалийнхан мэдэгдэж байв. Үүнтэй холбоотойгоор Финланд дахь ОХУ-ын Элчин сайдын яам иргэддээ хандан Европын орнууд руу Оросын дугаартай машинтай зорчихгшүй байхыг уриалжээ. 

Үүний зэрэгцээ, мөн л хориг арга хэмжээтэй холбоотойгоор Европын орнууд руу нэвтэрсэн оросуудаас ухаалаг гар утас, зөөврийн компьютер, чемодан, гоо сайхны хэрэгслийг хурааж болзошгүй гэнэ. Эдгээр хувийн хэрэгслүүд мөн л хоригийн жагсаалтад орсон гэдгийг Еврокомисс анхааруулжээ.

Энэ хориг жуулчдад ч хамаарах гэнэ. Мөн гааль дээр арьс, үслэг эдлэл, хагас үнэт болон үнэт чулуу, фотоаппарат, ариун цэврийн цаас, шампунь, шүдний оог ч хуульб ус бараа гэж үзэн хурааж болзошгүй аж.

Г.Бямбасүрэн