Говь-Алтай аймгийн удирдлагууд олон нийтэд Жанчивын талбай гэх нэрээр танил болсон Монгол Улсын баатар М.Жанчивын хөшөөтэй талбайг өнгөрсөн зун сэргээн засварлах шийдвэрлэсэн. Өнөөдөр сэргээн засварласан төв талбайн нээлтийг үйл ажиллагааг аймгийн ЗДТГ-аас зохион байгуулж байна. Гэвч М.Жанчивын хөшөөг буцааж байрлуулсангүй.

Тодруулбал, өнгөрсөн зун Говь-Алтай аймгийн удирдлагууд 100 жилийн ойн баярын өмнөхөн аймгийн төв талбайг засварлахдаа Монгол Улсын баатар М.Жанчивын хөшөөг нүүлгэсэн.

Тэгвэл уг хөшөөний суурин дээр Боорчийн хөшөөг байрлуулахаар зэхэж байгаа гэх мэдээлэл нутгийн иргэдийн дунд тархаж эхэллээ. Алтайчуудын хувьд үеийн үед бахархан дурсах түүхэн хөшөөг ийнхүү нүүлгэн шилжүүлж байгаа нь шүүмжлэл дагуулж байна.  М.Жанчив гэх эрхэм хүмүүний түүхээр бахархаж, үеийн үед хамгаалж явах нь Говь-Алтай аймгийнхны үүрэг. Гэвч О.Амгаланбаатар тэргүүтэй Говь-Алтай аймгийн удирдлагууд аймгийнхаа түүхэн хүний бахархалт түүхийг үл тоож, хөшөөг нь ийнхүү буулгав. Чухам ямар учир шалтгаанаар уг хөшөөг буулгасан талаар аймгийн удирдлага ам нээсэнгүй өнөөдрийг хүрлээ.

Говь-Алтай аймгийн иргэдийн хувьд өнөөдрийн аймгийн төв талбайн нээлтийн үйл ажиллагааны үеэр М.Жанчив баатрын хөшөөг буцааж байрлуулах байх гэх хүлээлттэй байсан ч талаар болов. 

ТҮҮХЭН БАРИМТ: Монгол Улсын баатар Магсарын Жанчив нь Хантайшир уулын аймгийн Сүжигт Гүний хошуу одоогийн Говь-Алтай аймгийн Шарга сумын нутагт Зах гэдэг газар 1923 онд төржээ. Хүний ганц хүү байсан учир гэрээр хуучин бичиг сурч, мал маллаж байгаад 1943 онд хугацаат цэргийн албанд мордож, алба хаах хугацаандаа холбоочны мэргэжил эзэмшин салааны дарга болж, ахлах түрүүч цол авчээ. М.Жанчив нь японы милитарист хүчний давагдашгүй цайз гэж нэрлэгдэж байсан Жанчхүүгийн давааны бэхлэлтийг эзлэх үеийн хэд хоногийн ширүүн тулалдаанд анги салбарыг холбоогоор хангах байлдааны даалгавар авч дайсны бөмбөгдөлт суманд 2 дахь удаагаа тасарсан холбооны утсыг залгахаар галын шугамруу мөлхөж явахдаа шархадсан ч гэмтлийн цэгт хүрч, үүргээ гүйцэтгэх үед ахин шархаджээ. Жанчив эцсийн мөчид утасны 2 үзүүрийг амандаа зууж, биеэрээ холбоо дамжуулж, өөрийн ангийн давшилтыг хангасаар амь үрэгдсэн байна. М.Жанчивын гавьяаг эх орон, төр засаг өндрөөр үнэлж, 1965 онд байлдааны гавьяаны улаан тугийн одон, 1975 онд Монгол Улсын баатар цолоор нэхэн шагнасан билээ. МУ-ын баатар М.Жанчивын мөнх алдрын гэгээн дурсгал болсон хөшөө Говь-Алтай аймгийн төв болон төрсөн нутаг Шарга сумын төвд сүндэрлэн, түүнийг ард түмэн нь хайрлан хүндэлж, бахархан дурссаар байна.