2023 оны зун Монголыг зорьсон орос жуулчдын тоо 1,7 дахин нэмэгдсэн гэж ОХУ-ын Холбооны гаалийн алба Телеграм сувагтаа мэдээлжээ. 

"2023 оны тавдугаар сараас хойш Монголтой залгаа хилийн автозамын шалган нэвтрүүлэх боомтоор 146 мянган зорчигч нэвтэрчээ. Энэ нь өнгөрсөн онтой харьцуулахад 70 хувиар нэмэгдсэн үзүүлэлт" гэж Оросын Холбооны гаалийн алба мэдээлсэн байна. 

Мэдээлэлд онцолсноор, энэ зун Сибирийн гаалийн ажилтнууд хоёр чиглэлд өдөрт дунджаар 1,5 мянган машинд үзлэг шалгалт хийж нэвтрүүлжээ. Баасан гараг болон амралтын өдрүүдэд зорчигчдын тоо эрс нэмэгдэж, өдөрт 2,4 мянга хүртэлх тооны хүн нэвтэрч байгаа гэнэ.

"2023 онд тээврийн болон зорчигчийн урсгал хамгийн их байсан үе нь долдугаар сар. Түүнчлэн Монголд уламжлалт үзэсгэлэн худалдаа, аялал жуулчлалын наадмууд болсон наймдугаар сарын дунд үеэр жуулчдын урсгал нэмэгдсэн" хэмээн Холбооны гаалийн алба мэдээлсэн байна.

Оросын талаас жуулчны урсгал эрс нэмэгдсэнтэй холбоотойгоор амралтын өдрүүдэд нэмэлт хүч гарган ажиллаж, цагийн хуваарийг уртасгасан хэмээн мэдээлэлд өгүүлжээ. 

Г.Бямбасүрэн