ОХУ-ын Ерөнхийлөгч Владимир Путин  Украины ерөнхийлөгчийг "нацизмыг баатарлаг болгон харуулж буй еврей" хэмээжээ. Энэ талаар The Moscow Times сонин мэдээлсэн байна. 

Владимир Путин мэдэгдэлдээ "Украины хүн төрөлхтний эсрэг мөн чанарыг халхавчлах, нацизмыг алдаршуулах гэсэн оролдлогоо нуухын тулд гарал үүслээ ашигладаг еврей гаралтай хүнийг барууны зааварлагчид Украины төрийн тэргүүнээр тавьсан" хэмээжээ. 

"Еврей гаралтай хүн нацизм болон нэгэн цагт Украинд Холокостыг удирдаж байсан хүмүүсийг алдаршуулж байгаа нь нөхцөл байдлыг улам жигшүүртэй болгож байна. Тэр үйл явдлын улмаас сая гаруй хүнийг устгасан шүү дээ. Үүнийг Израилийн жирийн иргэд хамгийн сайн ойлгоно. Тэд ннтернэтээр юу ярьж байгааг хараарай” гэж Путин мэдэгджээ. 

Энэ мэдэгдлийн хариуд Украины Гадаад хэргийн яамны төлөөлөгч Олег Николенко Путиний мэдэгдэл нь "Оросын элитийн антисемитизмийн илрэл" хэмээн нэрлэсэн байна. Улмаар дэлхий дахинд хандан Оросын Ерөнхийлөгчийн мэдэгдлийг эсэргүүцэхийг уриалж, "орчин үед угсаа гарлаар нь ялгаварлан гадуурхаж болохгүй" хэмээн Николенко мэдэгджээ.

Өмнө нь, зургадугаар сард Путин мэдэгдэл хийхдээ мөн л Зеленскийн гарал угсаатай холбоотой сэдвийг хөндөж, Зеленскийг "еврей биш харин еврей түмний гутамшиг" хэмээж байв.

Г.Бямбасүрэн