Ромын пап Францис есдүгээр сарын нэгнээс дөрөвний өдрүүдэд Монгол Улсад айлчилсан. Тэрбээр энэ айлчлал хийхээс өмнөхөн Оросын католик сүсэгтнүүдэд хандан үг хэлэхдээ "Аугаа Орос орон" хэмээн хэлсэн нь олны дургүйцлийг төрүүлж, Ромын папыг Украины дайныг дахин дэмжиж байна хэмээн буруутгасан юм.

Аугаа Орос улс гэж хэлснийхээ төлөө дэлхий дахинаа шүүмжлэлийн бай болж, Польшийн сэтгүүлийн нүүрэн дээр Z үсэг бүхий танктай явж байгаагаар шог зургаар дүрслэгдсэн Ромын пап олныг бухимдуулсан үгээ тайлбарлажээ.

Тэрбээр "Аугаа Орос улс" гээдг нь түүхэн уламжлал, баялаг соёлын талаар хэлсэн үг, соёлын өв империалист байх боломжгүй гэж онцолсон байна.

"Би Оросыг газарзүйнх нь хувьд биш харин соёлын өвтэй нь холбоотойгоор хэлсэн. Намайг сургуульд байхад зааж байсан I Петр, II Екатеринагийн тухай бодол санаанд минь буусан. Энэ өв соёлыг хүлээн авахыг би уриалсан" хэмээн Ромын пап Монголоос Ватикан буцах замдаа онгоцонд хийлгэсэн хэвлэлийн бага хурлын үеэр мэдэгджээ.

Мөн Оросын соёл баялаг, сайхан түүхтэй гэдгийг онцолсон байна. 

"Уран зохиол, хөгжмийн талаар санахад л болно, Достоевскийг л аваад үз. Энэ бүхэн нь хүмүүнлэгийн ёсыг илэрхийлж байна. Тиймээс л би өв соёлын талаар ярьсан" хэмээн Ромын пап Францис мэдэгджээ. 

Эргэн сануулахад, наймдугаар сарын 25-ны өдөр Ромын пап Францис Бүх Оросын католик залуусын уулзалтын оролцогчидтой цахимаар холбогдон уулзах үеэрээ "Та нар аугаа Орос орны хойч үе, аугаа орон, түүний түүх, соёлын гэгээн, аугаа зүтгэлтнүүдийн хойч үе гэдгээ маратж болохгүй. Та бүхэн аугаа Орос орны залгамжлагчид, тиймээс орос хүн байж чадаж байгаад тань баярлалаа. Энэ өв соёлоо хадгалж, хамгаалж яваарай, баярлалаа" хэмээсэн юм. Мөн тэрбээр энэ үгэндээ I Петр болон II Екатеринаг ч дурдаж байв.

Үүний дараа олон улсад шуугиан дэгдэж, Украины Гадаад хэргийн яам Ромын папыг империалист суртал ухуулгыг дахин сэргээж байгаад буруутгасан. Түүнчлэн Украины Ерөнхийлөгчийн захиргааны тэргүүний зөвлөх Михаил Подоляк Ромын папыг "Оросын суртал ухуулгын арга хэрэгсэл" хэмээн нэрлэсэн юм.

Г.Бямбасүрэн