Японы өндөр настай уулчин Юичиро Миура гайхалтай амжилт тогтоожээ. Тэрбээр найз нөхөд, гэр бүлийнхнийхээ хамтаар Фүжи уулын оргил руу тэргэнцэртэйгээр гарсан гэж Kyodo мэдээлсэн байна. 

Өдгөө 90 настай Юичиро Миура 3776 метрийн өндөртэй Фужи уулын оргил руу тэргэнцэртэйгээр гарчээ. Тэрбээр гурван өдрийн туршид авирсан байна. Тусгай тоноглогдсон уулчны тэргэнцрээр үүр хаяарахад авирч эхлэн, бусад уулчдын тусламжтайгаар Фүжи уулын оргилд хүрчээ.

Гурван өдрийн хугацаанд тэрбээр ихэнхдээ тэргэнцрээ олсоор чирж явсан гэнэ. 

"Хүмүүсийн ачаар би оргилд гарах хүслээ биелүүлж чадлаа. Энэ бол үнэхээр агйхалтай. Хөгжилтэй хамт олонтойгоор оргил ру авирлаа. Би энэ үйл явдлыг хэзээ ч мартахгүй" хэмээн Миура ярьжээ.

Цаначин, уулчин Миура өмнө нь, 2013 онд 80 настайдаа Эверестэд авирсан хамгийн өндөр настай хүн болж байв. Түүнчлэн 1966 онд хурд сааруулахын тулд шүхэр ашоиглан Фүжи уулнаас цанаар амжилттай гулган бууж байжээ.

2020 оны зургадугаар сард 87 настай байхдаа эмнэлэгт хэвтсэн бөгөөд хүзүүний мэдрэлийн судал дарагдсаны улмаас түүний нэг гар, хөл саажсан байна. Тэрбээр тэргэнцэрээ гараараа жолоодож явдаг ч хөдлөх үед гар хөл нь хүчтэй өвддөг аж.

Г.Бямбасүрэн