Гэгээн Ширээт Улсын төрийн тэргүүн, Ромын пап Францис есдүгээр сарын нэгнээс дөрөвний хооронд манай улсад айлчлахаар болсон. Олон зууны дараа Монгол Улсад хийгдэж буй Ромын папын айлчлал дэлхий нийтийн анхаарлын төвд байна. Өнөөдрөөс манай улсад айлчлалаа эхлүүлж буй Ромын пап Францисын тухай цөөн сонирхолтой баримтуудыг хүргэж байна. 

1. Хорхе Марио Берголью нэртэй байсан Ромын пап Францис 1936 оны 12 дугаар сарын 17-ны өдөр Буэнос-Айрес хотноо мэндэлжээ. Италийн цагаачдын гэр бүлээс гаралтай, эцэг нь төмөр замд ажиллаж байсан гэдэг.

2. Ромын пап нэгэнтээ дурлаж байсан бөгөөд энэ нь түүний дурласан цор ганц эмэгтэй байсан гэнэ. Тэрбээр 12 настайдаа хөрш айлын охинд ухаангүй дурлаж байжээ. Энэ охинтой гэрлэж чадахгүй бол санваартан болно гэж өөртөө андгайлж байсан гэнэ. Мэдээж энэ нь түүний санваартан болсны гол шалтгаан биш ч гэсэн тэр ямартай ч хэлсэндээ хүрчээ. 

3. Түүний ганцхан уушги ажилладаг. Хорхе Марио 20 настайдаа уушгины хүнд өвчний улмаас үхлийн зааг дээр очиж байжээ. Ингээд эмч нар мэс засал хийн, залуугийн амийг аврахын тулд баруун уушгины дээд хэсгийг тайрахаас аргагүй болсон байна. 

4. Санваартан болохоосоо өмнө Хорхе Марио ажлаа хэдэнтээ сольж байжээ. Тэр бүү хэл Буэнос-Айрес хотын шөнийн клубт хамгаалагч ч хийдэг байсан гэнэ. Үүний зэрэгцээ цэвэрлэгч хийж амин зуулгаа залгуулдаг байсан аж. 

5. Хожим тэрбээр уран зохиол, сэтгэл судлал сонирхож эхэлжээ. Ромын пап Буэнос-Айресын катлоик их сургуульд гүн ухаан судалж эхэлсэн байна. Түүнчлэн тэрээр химийн ухааны магистрын зэрэгтэй. 

6. Тэрбээр нэн даруу амьдардагаараа алдартай. Аргентинд санваартан байхдаа гурван давхар байрны жижигхэн байранд амьдарч, нийтийн тээврээр, явж, өөрөө хоолоо хийж иддэг байжээ. 

7. Ромын пап зурагт үздэггүй. Тэрыээр 1990 оноос эхлэн ямар ч телевизийн нэвтрүүлэг үзэхээс татгалзжээ. Учир нь 1990 оны долдугаар сарын 15-нд шилжих шөнө зурагт үзэхгүй гэсэн амлалтыг Гэгээн Марияд өгч байсан гэнэ. Гэхдээ тэр радио сонсдог аж. 

8. Ромын пап интернет ч ашигладаггүй. Гэхдээ өдөрт 10 минутыг сонин уншихад зарцуулдаг аж. 2015 онд хөгжлийн бэрхшээлтэй хүүхдүүдтэй цахимаар холбогдон уулзах үеэрээ техникий учрыг олдоггүй, компьютер ашиглаж чаддаггүй хэмээн ярьж байсан гэнэ. Гэхдээ Твиттерт түүний хуудас байдаг, энэ хуудсыг туслахууд нь хөтлөдөг аж. 

9. Ромын пап латин, испани, итали хэлтэй. Түүнчлэн англи, франц, герман, португаль, украин хэлээр ойлголцдог гэнэ. Тэрбээр өөрийнхөө төлөө биш харин дэлхийн өнцөг булан бүрийн хүмүүстэй харилцахын тулд хэл сурдаг хэмээн ярьж байв.

10. Пап Францис бүжиг, тэр дундаа тангонд дуртай. Тэрбээр танго үзэж, бүжиглэж, тангоны ая сонсох дуртай гэнэ.