ХҮН-аас сурагчийн дүрэмт хувцсыг өөрчлөх асуудлаар өнөөдөр /2023.08.30/ мэдээлэл хийлээ.

ХҮН-ын Удирдах зөвлөлийн гишүүн Ц.Алтансор “Дүрэмт хувцас нь хүүхдүүд хувцсаараа бие биенээ ялгаварлан гадуурхахгүй байх, жигд тэгш, шударга гэсэн сэтгэлгээг хүүхдэд суулгах үндсэн зорилготой. Гэтэл 10 жилийн өмнөх стандартаар хийгдсэн дүрэмт хувцас хүүхдийн эрүүл ахуй, өсөлт хөгжилд хэрхэн нөлөөлдөг, эдийн засагт ямар хүндрэл дагуулдаг гэх асуудал сөхөгдөөд байна.

Дүрэмт хувцас нь хүүхдийн биед саад учруулахгүй, чийг гадагшуулах шаардлагатай. Гэтэл 10 жилийн өмнөх стандартаар хийгдсэн энэ хувцсыг өмсөхөөр маш олон асуудал гардаг. Биеийн хөдөлгөөнд саад учруулдаг, чийг гадагшлуулдаггүй, маш үнэтэй байдаг.

Олон улсын маш олон сургуульд эцэг эх, сургууль, хүүхдүүд хамтран дүрэмт хувцасныхаа шийдлийг гаргадаг. Зөвхөн хувцасны өнгийг зааж өгөөд, сонголттой байдлыг бий болгодог” гээд хүүхдийн өсөлт хөгжил өөрчлөгдсөн учраас сурагчийн дүрэмт хувцсыг ч өөрчлөх шаардлагатайг хэлж байна.

ХҮН-ын Удирдах зөвлөлийн гишүүн П.Наранбаяр: Эцэг эх, багш, сурагчийн оролцсон Сургуулийн зөвлөл гэж бий. Сургуулийн зөвлөл сонголт хийж, өнгө ижилсүүлсэн, нүсэр биш төсөр байдлаар сурагчийн дүрэмт хувцсыг шийдвэрлээч гэсэн эрх бүхий байгууллагад хандаж байна. Сонголтыг эцэг эхэд өгөөч.

Өнөөдрийн өмсөж байгаа дүрэмт хувцас хүүхдийн хөдөлгөөнийг маш их хорьдог. 10 жилийн өмнө гарсан стандартаа өөрчилж, сургууль бүр өөрийн онцлогоор, хямд төсөр шийдлээр хүүхдийн дүрэмт хувцсыг шийдвэрлэх боломжийг өгөөч. Улсын хэмжээнд тавьсан хатуу стандартаа өөрчлөөч" гэсэн байр суурийг илэрхийллээ.

Б.Хэрлэн