Хятадын төрийн өмчийн "Стандарт газрын зурагны зурагзүйн үйлчилгээ" байгууллага 2023 оны газрын зургийн багцыг танилцуулжээ. Энэ зураг дээр Оросын газар нутгийн нэг хэсгийг Хятадынх гэж оруулсан байна. 

РБК, агентлагийн мэдээлснээр, Амур мөрний Большой Уссурийск арлыг Хятад өөрийн нутаг гэж газрын зураг дээрээ тэмдэглэжээ. 2008 онд Орос, Хятадын хооронд хийсэн гэрээний дагуу энэ арлыг хоёр орны хооронд хуваасан байдаг аж. Харин БНХАУ-д танилцуулсан шинэ газрын зураг дээр энэ арлыг бүхэлд нь Хятадынх гэж тэмдэглэсэн байна. Мөн тайлбар хэсэгт "газрын зургийг Хятад болон дэлхийн бусад орнуудын хилийг тогтоох үндэсний стандартын дагуу бүтээв" хэмээжээ. 

Большой Уссурийск арал нь 350 квадрат километр орчим талбайг эзлэн оршдог. XIX зуунаас эхлээд Орос, Хятадын хооронд энэ арлын төлөө тэмцэл эхэлж, харин 1920-1930-аад онуудад Зөвлөлтийн цэргүүд хяналтаа тогтоож байв.

Зөвлөлт Холбоот Улс задран унасны дараа энэ арал Оросын хяналтад үлджээ. Харин Хятад энэ нутгийг ихээхэн сонирхож, 1964 оноос эхлэн арлын статустай холбоотой маргаан үүсгэсэн. Улмаар 2008 онд Орос улс Большой Уссурийск арлын баруун хэсэг болон бусад нутгийг Хятадын талд шилжүүлжээ.

Г.Бямбасүрэн