Коронавирусийн халдвар тархахаас сэргийлж гурван жил долоон сарын өмнө тавьсан хилийн хоригоо Хойд Солонгосын эрх баригчид цуцалжээ. Энэ талаар KBS телевиз мэдээлсэн байна. 

Наймдугаар сарын 27-ны өдөр Тахлаас урьдчилан сэргийлэх штаб мэдэгдэл хийж, хилийн чанадад байгаа Хойд Солонгосын иргэдийг эх орондоо ирэхийг зөвшөөрсөн байна. Дэлхий даяар цар тахлын нөхцөл байдал тогтворжиж байгааг харгалзан тахлын эсрэг арга хэмжээний зэрэглэлийг өөрчлөхөөр болсон гэж штаб мэдэгджээ. Хил нээгдсэний дараа Хойд Солонгост ирсэн хүмүүс нэг долоо хоногийн туршид тусгаарлалтад, эмнэлгийн хяналтад байх ёстой гэнэ. 

Эргэн сануулахад, Хойд Солонгос 2020 оны нэгдүгээр сард хилээ хааж, 2022 оны тавдугаар сард онц байдал зарлаж байлаа. Харин үүнээс хойш гурван сарын дараа буюу 2022 оны наймдугаар сард коронавирусийн халдварыг ялсан хэмээн мэдэгдэж, төмөр замын ачаа тээвэрлэлтийг сэргээж байв.

Г.Бямбасүрэн