Америкийн Флорида мужийн Жексонвилл хотод гэмт этгээд дэлгүүрт гал нээсний улмаас гурван хүн амиа алджээ. Энэ талаар орон нутгийн цагдаагийн газраас авсан эх сурвалжтайгаар АВС мэдээлсэн байна. 

Эх сурвалжийн мэдээлснээр, гэмт этгээд Африк гаралтай америкчуудыг үзэн яддаг байсан, арьс өнгөөр ялгаварлан гадуурхах сэдлээр гэмт хэрэг үйлдсэн гэж хотын цагдаагийн газар мэдэгджээ. Гэмт этгээд AR-15 винтовоор хүмүүс рүү галласны дээр тэрбээр гар буу, сум үл нэвтрүүлэх хантаазтай байсан гэнэ. Хэргийн улмаас хоёр эрэгтэй, нэг эмэгтэй амиа алдсан байна. 

Одоо хэргийг цагдаагийн газар шалгаж байгаа, гэмт этгээд ямар нэг гэмт бүлэглэлийг төлөөлж хэрэг үйлдсэн гэх шинж тэмдэг байхгүй гэж цагдаагийн газар мэдэгджээ. 

Г.Бямбасүрэн