Ухаалаг утас үйлдвэрлэлтээрээ дэлхийд тэргүүлэгчдийн тоонд багтдаг, түүнчлэн гэр ахуйн цахилгаан бараа, планшет, ухаалаг цаг, цахилгаан скүтер, цахилгаан дугуй зэрэг олон төхөөрөмж үйлдвэрлэдэг Xiaomi цахилгаан машин үйлдвэрлэхээр болжээ.

SCMP сонины мэдээлснээр, БНХАУ-ын Хөгжил, шинэчлэлийн улсын хороо Xiaomi корпорацийг Бээжин дэх үйлдвэртээ цахилгаан машин үйлдвэрлэхийг зөвшөөрсөн байна. Энэ нь тус компани өөрсдийн гэсэн машин үйлдвэрлэн гаргах боломжийг олгох анхны алхам бөгөөд цаашлаад тэдний хүсэлтийг БНХАУ-ын Аж үйлдвэрийн яам дэмжих ёстой юм.

Xiaomi компани цахилгаан машин үйлдвэрлэх төлөвлөгөөтэй байгаа талаараа 2021 онд зарлаж байлаа. Арван жилийн туршид цахилгаан машин үйлдвэрлэхэд 10 тэрбум долларын хөрөнгө оруулалт хийж, 2024 оны эхний хагаст цуврал машин үйлдвэрлэн гаргахаар төлөвлөж байгаа аж. Энэ компанийн үйлдвэр жил бүр 200 мянга хүртэлх тооны цахилгаан машин үйлдвэрлэх хүчин чадалтай байх юм байна.

Г.Бямбасүрэн