Шотландын Эдинбургийн амьтны хүрээлэнд байх Хааны III Нильс Улаф оцон шувуу өндөр цол хэргэмтэй болсон талаар Цэргийн найрал хөгжмийн Хааны Эдинбургийн  парадын цахим хуудсанд мэдээлжээ. 

"Дэлхийд алдартай хатан хааны оцон шувуу өнөөдрөөс эхлэн хошууч генерал цол, Буве арлуудын гүн, Эрхэм дээдэс Норвегийн  хааны албан ёсны бэлгэдэл болж байна" хэмээн хэвлэлийн мэдээнд өгүүлжээ. Гвардынхны өгүүлснээр Нильс Улаф амьтны хүрээлэнгийн бусад оцон шувуунуудад үлгэр жишээ болохуйц байсан тул өндөр цолоор шагнасан гэнэ. 

Энд дуулгахад, оцон шувуу нь Норвегийн гвардын бэлгэдэлд тооцогддог. Одоогоос 110 жилийн өмнө Норвегийн оршин суугч Эдвард Сальвесен амьтны хүрээлэнд оцон шувуу бэлэглэжээ. Үүнээс хойш гвардынхан Эдинбургийн парадад оролцохоосоо өмнө амьтны хүрээлэнд очдог уламжлалтай болсон байна.

1972 онд парадын оролцогчид оцон шувууг "үрчлэн" авч, түүнийг Норвегийн хаан Улафын нэрээр нэрлэжээ. Ингээд энэ оцон шувууны үр төл түүний цол хэргэмийг өвлөх болсон байна. III Нильс Улаф 2005 онд хүндэт гвардын хурандаа цолтой байсан бөгөөд 2016 онд бригадын генерал цолтой болсон аж.

Г.Бямбасүрэн