Албанийн нэгэн зоогийн газарт хоол идчихээд мөнгийг нь төлөлгүй гарсан Италийн дөрвөн жуулчны тооцоог Италийн Ерөнхий сайд Жоржиа Мелони хувиасаа мөнгө гарган төлжээ. Энэ талаар Politico мэдээлсэн байна. 

Эх сурвалжийн мэдээлснээр, Албанийн Берат хотод өнгөрсөн долоо хоногт Италийн Ерөнхий сайд гэр бүлийнхэнтэйгээр хамт зочилж очжээ. Энэ үеэр орон нутгийн хэвлэлүүдээр Италийн дөрвөн жулчин зоогийн газарт хоол идээд гарахдаа мөнгөө төлөөгүй гэсэн мэдээ гарч байхыг Ерөнхий сайд олж харжээ. 

Итали жуулчдын талаар олж мэдмэгцээ Ерөнхий сайд Жоржиа Мелони Албани дахь Италийн Элчин сайдад хандан, "Яваад тэр тэнэгүүдийн тооцоог хийгээд өгөөч" хэмээн хэлсэн гэнэ. "Ерөнхий сайд тооцоог нь хийхийг санал болгосон. Хэдхэн шударга бус хүмүүсийн өмнөөс манай италичуудын нэр хүнд унах ёсгүй" хэмээн Италийн Хөдөө аж ахуйн сайд мэдэгджээ. 

Италийн дөрвөн жуулчин мөнгөө төлөлгүй зоогийн газраас гарч байгаа бичлэг наймдугаар сарын 18-ны өдөр телевизээр цацагдсан байна. Тэд нийлээд 80 еврогийн хоол захиалж идсэн ч тооцоогоо хийлгүй зугтан гарч байгаа нь бичлэгт дүрслэгджээ.

Г.Бямбасүрэн