Hotel California дуугаараа Грэмми шагнал хүртэж байсан Америкийн Eagles рок хамтлаг The Long Goodbye нэртэй сүүлчийн тоглолтоо толилуулахаар болжээ. 

"Бидний зам хэн нэгэн маань мөрөөдөж байснаас ч урт удаан үргэлжиллээ. Гэхдээ бүх зүйлд цаг хугацаа гэж бий. Дуусгах цаг нь ирсэн. Бид шүтэн бишрэгчдэдээ сүүлчийн аялан тоглолтоо зориулах гэж байна" хэмээн хамтлагийнхан мэдэгджээ. Түүнчлэн гагцхүү шүтэн бишрэгчдийн сонирхол, дэмжлэгийн ачаар хамтлаг 50 гаруй жил оршин тогтнож чадсан гэдгийг онцлоод, тэдэнд талархал илэрхийлсэн байна  

Аялан тоглолтын хүрээнд хийгдэх эхний тоглолт есдүгээр сарын долооны өдөр Нью-Йорк хотод болох бол сүүлчийнх нь Миннесота мужийн Сент-Пол хотод 11 дүгээр сарын 17-ны өдөр үзэгчдийн хүртээл болох аж. Eagles хамтлагийг анх 1971 онд дуучин Дон Хенли, гитарчин Гленн Фрей нар үүсгэн байгуулж байв. Цаашлаад энэ хамтлагийн бүрэлдэхүүн хэдэнтээ өөрчлөгдөж, тарж, эргэн нийлж байлаа. Энэ хамтлагийн Eagles Their Greatest Hits 1971-1975 цомог Жексоны Thriller цомгийг ч давж, бүх цаг үеийн хамгийн борлуулалттай цомог болсон талаар 2018 онд Америкийн дуу бичлэгийн компаниудын холбоо мэдэгдэж байсан юм. Энэ хамтлаг оршин тогтнох хугацаандаа дэлхий даяар 150 сая хувь цомог борлуулж, зургаан удаа Грэмми хүртжээ.

Г.Бямбасүрэн