Оросын "Вагнер" хувийн цэргийн компанийн эзэн Евгений Пригожин зургадугаар сарын 24-нд бослого гаргасныхаа дараа Беларусийн Ерөнхийлөгч Лукашенкотой хэлэлцээ хийсний дүнд Беларусийг зорьсон. ОХУ-ын эрх баригчид түүний эсрэг хэрэг үүсгэхгүй гэж мэдэгдсэн ч Пригожинтой холбоотой бүхий л бизнесийг шалгахаар болсон юм. Энэ хүрээнд Пригожиний гэрт нэгжлэг хийжээ. 

Евгений Пригожиний гэр болон ажлын байранд хууль сахиулагчид нэгжлэг хийж, хиймэл үс, зэвсэг, их хэмжээний бэлэн мөнгө, паспортууд олсон талаар "Россия1" суваг мэдээлсэн байна. Нэгжлэгээр олдсон паспортууд нь хуурамч паспорт байсан бөгөөд гэрээс нь мөн алтан гулдмайнууд олджээ. Нэгжлэгийн үеэр хураасан эд зүйлсийг Пригожинд эргүүлэн өгсөн гэж зарим эх сурвалж мэдээлж байна. Тухайлбал, Сергей Шойгугийн бэлэглэсэн гар буу болон нэгжлэг хийх үеэр олдсон өөр нэг зэвсгийг Пригожинд эргүүлэн өгсөн гэх бөгөөд тэрбээр хураагдсан эд зүйлсийг авахаар өөрийн биеэр Петербургийн Холбооны аюулгүй байдлын газарт очжээ. 

Үүний зэрэгцээ нэгжлэг хийх үеэр олдсон 10 тэрбум рублийг ч Пригожинд эргүүлэн өгсөн гэнэ. Гэхдээ мөнгийг хүлээн авахаар Пригожин өөрөө ирээгүй, итгэмжлэл бүхий этгээд ирж авсан гэнэ.

Г.Бямбасүрэн