Марк Цукербергийн Мета компаниас гаргасан Threads олон нийтийн сүлжээний аппликейшн AppStore-д байршжээ. Энэ аппликейшнийг долдугаар сарын зургааны өдрөөс эхлэн татах боломжтой аж.

Threads нь Твиттертэй адил олон нийтийн сүлжээ бөгөөд текстэн мэдээлэл оруулж, түүнд хариулж, бусдын пост дээр лайк дарж, хуваалцах боломжтой гэнэ. Энэ сүлжээг Инстаграмтай холбосон тул Инстаграмын хэрэглэгчид Threads рүү профайл болон дагагчдаа шилжүүлж болох аж.

Инстаграм өмнө нь, 2019 онд Threads нэртэй сүлжээ гаргаж байсан бөгөөд энэ сүлжээ нь Snapchat-тай өрсөлдөх байв. Энэ сүлжээгээр дамжуулж Инстаграмын хэрэглэгчид мэдээлэл, гэрэл зураг, видео солилцох боломжтой байлаа. Гэвч эрэлт муу байсан тул 2021 онд хааж байсан юм.

Г.Бямбасүрэн