2023 оны зургадугаар сарын сүүлээс Оросын иргэд Герман руу машинтайгаа аялах үед хувийн автомашиныг нь хурааж байгаа гэх мэдээлэл Оросын хэвлэлүүдээр гарчээ. 

Тодруулбал, зургадугаар сарын 30-ны өдөр "Фонтанка" сонинд нийтлэгдсэн мэдээлэлд өгүүлснээр, Германд ОХУ-ын иргэдийн Оросын дугаартай машиныг "хоригт заасан" гэсэн шалтгаанаар хурааж эхэлсэн байна. Энэ мэдээлэлтэй холбоотойгоор РБК агентлаг ХБНГУ-ын Гаалийн ерөнхий газраас тодруулга авчээ. 

Гаалийн газрын мэдээлснээр, ОХУ-ын иргэд хувийн машинтайгаа Герман руу зорчвол үүнийг ОХУ-ын эсрэг тавьсан Европын хоригийг зөрчсөн гэж үзэх гэнэ. Европын хууль тогтоомжид хориг арга хэмжээний хүрээнд автомашиныг хурааж болох талаар тодорхой тусгаагүй ч гаалийн ажилтнууд машин хураах нь хуульд нийцсэн үйлдэл гэж үзэх аж. 

Хэдийгээр хуульд нарийвчлан тусгаагүй ч Оросын иргэдийн машиныг хурааж эхэлсэн, түүнчлэн Гаалийн байгууллага ч үүнийг баталсан тул Оросын хэвлэлүүд олон нийтэд хандан Герман руу зорчихдоо хувийн тээврийн хэрэгслээ ашиглахгүй байхыг уриалсан байна.

Г.Бямбасүрэн